Publiká riba 04 Sèptèmber 2023
WILLEMSTAD – Entrante dia promé di ougùstùs a nombra dos miembro nobo den e Komishon di Kondekorashon Real. Sra. Lusette Verboom a keda nombrá komo presidente di e komishon i sr. Eithel Hato tambe a keda nombrá den e komishon. Tur aña di nobo un grupo den nos komunidat ta risibí rekonosementu di rango haltu, kual ta un Kondekorashon Real. E komishon di Kondekorashon Real tin e meta pa kanalisá e proseso di postulashon di kandidatonan.
Aktualmente e komishon di Kondekorashon Real ta konsistí di Sra. Lusette Verboom, Sr. Trevor Bakhuis, sra. Maria Liberia Peters, sr. Eithel Hato i sra. Marisol Roosberg. Mesora ta hasi uso di e oportunidat pa gradisí sr. O’dennis Daal ku a fungi komo presidente durante e último 2 añanan i ta dese’é tur klase di éksito.
E oportunidat pa postulá un persona ta habrí te ku di dos siman di sèptèmber i ta enkurashá komunidat pa postulá personanan ku di un forma òf otro a bin ta hasi trabou boluntario pa adelanto di nos sosiedat. Por postulá siudadanonan ku a duna un aporte eksepshonal pa sigur 10 pa 15 aña, komo boluntario òf siudadano ku a duna un aporte ekstraordinario banda di nan trabou. Tin diferente kategoria di Kondekorashon Real. E dos kategorianan mas usual na Kòrsou ta Orde van Oranje Nassau i Orde van Nederlandse Leeuw. Den e kategorianan akí tin rango di Lid, Ridder, Officier i mas. Konforme e aporte eksepshonal i ekstraordinario di e persona e ta haña un kondekorashon komo lid òf ridder, ku ta esnan ku mas sa otorgá na Kòrsou.
Pa risibí un Kondekorashon Real e persona mester a kontribuí di forma eksepshonal na nos komunidat. E kontribushon por ta sea pa medio di su aporte na bienestar di hóben, adulto òf nos grandinan. E persona mester a hasi trabounan boluntario, sin pago òf salario, pa un temporada di sigur 15 aña i ku a dediká algun ora pa siman na esaki. Tambe un persona ku a kontribuí òf destaká di forma eksepshonal den deporte, enseñansa òf siensia na Kòrsou por bini na remarke pa risibí un Kondekorashon Real.
Abo por postulá un kandidato i asina kontribuí pa un persona haña e rekonosementu ku e meresé na nivel di Reino Hulandes. Pa postulá bo kandidato bo por bishitá e página gobiernu.cw/kondekorashonreal, download i yena e formulario i entregá bo petishon na Bentana di Informashon na Saliña. Huntu ku e formulario mester entregá algun dokumento importante tambe. Banda di informashon di kontakto di e kandidato, mester entregá informashon di trabounan di e persona postulá, huntu ku afirmashon di dos otro persona.
Pa pregunta tokante e Kondekorashon Real por tuma kontakto ku sr. Trevor Bakhuis na telefòn 671-6022.
Sra. Lusette Verboom, presidente nobo pa Komishon di Kondekorashon Real
