Publiká riba 01 Òktober 2018
WILLEMSTAD – Durante Siman di Kultura ku ta tras di lomba, Minister di Enseñansa, Siensia, Kultura i Deporte, sra. drs. Marilyn Alcalá-Wallé a bishitá diferente organisashon i institutonan pa asina selebrá e Siman di Kultura huntu ku nan. Minister ta suprayá ku ta importante pa nos tei semper pa otro: den bon i den momentonan difisil. Segun Minister M. Alcalá-Wallé: “huntu nos tin ku sostené i edifiká otro, apesar di nos diferensianan. Ta importante pa nos ta un komunidat uní ku ta radia “Union den Diversidat”. Pa e motibu aki a dediká atenshon na diferente gruponan di nos komunidat durante e Siman di Kultura.
Minister Marilyn Alcalá-Wallé a bishitá entre otro Sint Elisabeth Hospital pa dediká atenshon na esnan ku ta sufri di kebrante di salú. Aki a sera konosí ku algun miembro di gerente di hospital i a risibí un rekorido den hospital i papia tokante e historia i balor kultural di e edifisio. Sint Elisabeth Hospital ta aksentuá e balor di historia tangibel riku ku komo Pais nos mester ta orguyoso di dje. Alabes Minister a sera konosí ku diferente miembro di e personal di hospital i deseanan un dushi Siman di Kultura. Por lo demas Minister a bishitá e hóbennan di G.O.G. ku mayoria bes komunidat ta lubidá riba dje. Personal di G.O.G ta hasiendo un tremendo trabou ku e hóbennan aki, kaminda a dediká henter e siman ku ta tras di lomba, na nos Kultura. Pa medio di formashon artístiko (e.o. músika i arte), ta hasi traspaso di konosementu kultural i krea konosementu i konsientisashon di balor di nos kultura bou di nos hóbennan.
Tambe Minister Marilyn Alcalá-Wallé a bishitá Sentro di Detenshon i Korekshon Kòrsou ku tambe a dediká atenshon na Siman di Kultura. Pa medio di ekspreshon kultural i músika, detenidonan ta keda formá ku konosementu i práktikanan di nos Kultura. Totolika tambe a risibí bishita di Minister M. Alcalá-Wallé. Den un ambiente ameno Minister a baila i dibertí huntu ku e hóbennan, riba músika folklóriko pa asina duna e señal ku nos tin ku hiba un maneho di inklushon den nos sosiedat.
Un dokumentario di Pedro Luis Brión a keda resientemente publiká pa asina trese informashon i konsientisashon tokante un parti kultural fundamental di nos historia. Den e kuadro di sosten, Minister a duna atenshon na esaki. I pa no lubida riba konservashon di nos musiká di Serenada, Minister Marilyn Alcalá-Wallé a sostené e peligroso la musikal Yamada! Pa kloursurá e Siman di Kultura, Minister M. Alcalá-Wallé a hiba un palabra di gradisimentu durante e aktividat di klousura, ku a tuma lugá djadumingu 30 di sèptèmber 2018 na Zona Kultural.
Minister Marilyn Alcalá-Wallé ta gradisí tur instansia i organisashon ku ta promové nos kultura i Union den Diversidat.
Riba potrèt por mira:
