Nieuws

WILLEMSTAD – Biblioteka Nashonal Kòrsou (BNK) huntu ku Gobièrnu di Korsou a hasi apertura ofishal di e ‘Siman di Ban Lesa’. Esaki a tuma lugá na nos biblioteka nashonal Frank Martinus Arion. Siman di Ban Lesa ta un proyekto ku BNK ta organisá tur aña durante kual ta promové lesamentu serka nos muchanan. E aña aki esaki ta tuma lugá di 26 pa 30 di òktober 2020 i e tema ta ‘Kòrsou: Un Pasado Riku’.

Durante di e siman aki, tin vários aktividat kaminda outornan ta tene presentashonnan di forma virtual pa tur skol. E programa ta konsistí di un galeria di outornan lokal ku ta lesa kuenta i buki pa nos muchanan. Tur skol por sigui e aktividat via di BNK su página di Facebook Biblioteka Nashonal Kòrsou i via di TeleCuraçao di 10’or pa 11’or di mainta, plùs durante di e programa Mainta na TV-Direct di 8’or pa mitar di 9 di mainta.

Minister di Enseñansa, Siensia, Kultura i Deporte Sr. Eugene Rhuggenaath, a hasi e apertura na BNK kaminda Minister a mustra riba e importansha di lesamentu. Alabes Minister a splika ku lesamentu por desaroyá i asina stimulá nos pa kuminsá skibi i konta nos mes kuentanan. Esaki ta hasi nos literatura mas riku pa asina nos enrikesé nos idioma. Alabes Minister huntu ku Direktor di Sektor di Enseñansa i Siensia sr. Wladimir Kleinmoedig a haña rekorido den biblioteka serka direktor di BNK sr. Arjan de Wolf.
Tur e aktividatnan den e programa lo tuma lugá virtualmente. Vários outor ta presentá kuenta i bukinan pa tur mucha di e gruponan di enseñansa di fundeshi. Tambe djárason awor ta tene un ‘webinar’ kaminda mayornan ta haña mas informashon tokante e importansia di lesamentu. Alabes por bishitá e eksposishon di arte na BNK pa mucha i di mucha titulá ‘Kòrsou: un pasado riku’. Lo tene kuenta ku e medidanan di prevenshon den kuadro di COVID-19.

Pa mas informashon tokante e Siman di Ban Lesa por bishitá e wepsait di BNK www.bnkcuracao.com.
—

**Riba e potrètnan athunto por tuma nota di e momento kaminda Minister E. Rhuggenaath ta hasi apertura di e Siman di Ban Lesa i parti di e rekorido den BNK.

Pa un relato fotográfiko klik aki: Apertura siman di Ban Lesa

**Tambe por tuma nota di tur e outornan ku ta tene na presentashon e siman aki: Tio Ali, Edelmira Koko-Ricardo, Jenny Coffi-Alberto, Mercee Doran, Ruthie Panthophlet, Ingomar Marie, Andrea Geerlof, Crisen Schorea, Roselyn Jobse-Jesurun, Ariadne Faries, Merly Augusta, Donald Bakhuis, Laura Quast, Diana Lebacs, Ranella Petrona-Joe, Rudolf Crispulo, Myrurgia Muteel, Hubert Penza, Ronny Lobo, Kati Q i Jeannine Bakhuis.