Bishita di Minister Rhuggenaath na proyekto rekreativo na Oleander - Informashon tokante Gobièrnu di Kòrsou Bo opinion

Notisia

Bishita di Minister Rhuggenaath na proyekto rekreativo na Oleander

Geplaatst op 05 June 2020 dor di Ministerio Enseñansa, Siensia, Kultura & Deporte

WILLEMSTAD – Gobièrnu di Kòrsou a organisá vários aktividat den estrecho koperashon ku Sektor di Kultura i Deporte, Organisashon di Desaroyo Integral pa mucha (O.D.I.M), Fundashon Desaroyo i Progreso (F.D.I.P), Fundashon Desaroyo Deportivo Kòrsou (FDDK), Fundashon Kas di Kultura (K.d.K), Fundashon Amigunan di Cristu (F.A.D.C) i Jeugd Centrale Curacao (J.C.C). E programa rekreativo a keda organisá pa yunan di mayornan ku tabata traha durante di e periodo di ‘toke de keda’ relashoná ku e pandemia COVID-19. Gobièrnu a buska alternativa pa e muchanan den kuadro edukashonal i alabes rekreativo. E programa aki a tuma lugá di 13 pa 29 di mei 2020 pa muchanan entre 4 pa 12 aña. Un programa rekreativo den un ambiente sosial edukativo, kultural, di arte i deportivo. Esaki a keda organisá na vários lokalidat manera Pannekoek, J.C.C., Oleander, Kas di kultura, Seru Grandi Fuik, Sentro Deportivo Kòrsou (S.D.K) i Brakapoti.

E organisashonnan ariba menshoná a traha huntu i a organisá e diferente aktividatnan pa e muchanan. A partisipá mas òf ménos 250 mucha na e programa akí di kual nan a haña hopi aktividat den kuadro di drama, moveshon, músika, baile, obra di man, ‘speurtocht’ den naturalesa i arte plástiko. E tres (3) temanan sentral ku a pone enfoke riba djé ta: E bon yu di Kòrsou, naturalesa di Kòrsou i Forma di biba salú. Pa medio di e dos kantikanan “Konosé e vírùs” i “mi ta laba mi man” a trata e tópiko di COVID-19 i kon pa muchanan laba man.

Komo klousura riba 29 di mei e gruponan a tene vários presentashon. Minister di Enseñansa, Siensia, Kultura i Deporte, sr. E. Rhuggenaath, i direktor di Sektor di kultura, sra. Lizette Sambo-Velder, akompañá pa representantenan di e tim organisadó, a bishitá e grupo na Oleander. A partisipá un total di 47 mucha na e grupo ku tabata bou i guia di F.D.I.P. Nan a tene un presentashon rítmiko ku baile, kanto, obra di man i testimonio ku partisipashon di Minister, Direktor di Sektor di Kultura i Deporte i tur e lidernan. E muchanan a ekspresá nan eksperensia i mustra riba tur e kosnan ku nan a siña.

Gobièrnu por mira bèk riba un aktividat produktivo i éksitoso kaminda a duna e hóbennan un alternativa edukashonal i di rekreo ku aporte di nos lidernan. Nos ta yama danki na tur e fundashonnan, “helpdesk”, kordinadónan, lidernan i tim di limpiesa pa nan kontribushon i aporte na konstrukshon di nos nashon.

 

 

** riba e fotonan athunto por tuma nota di e programa i e aktividatnan ku Miniser E. Rhuggenaath, Direktor L. Sambo-Velder, representante di Fundashon ODIM sra. F. Jansen i tur e lidernan: Jeanella Wall, Nayree Doedel, Nydia Hato, Sugean Mambre, Thalisha Martina, Omara Martina, Shayline Lichtenberg, Rilaika Martina, Florcira Cornelia, Xenia Fornerino, Rodsan Angela, Soraima Sommer, Mirugia Silberie, Charissa Martis, Soraida st Jago, Marilyn Granviel, Charetti Romano, Gilsienne Girigorie, Luzmarina Jamanika, Tibisay Heide, Judeska Haynes, Rhoda de Jongh, Shoraima Haime, Shanoulle Gumbs, Diomara Hooi, Chantal Koeyers i Nashantaly Romano.

Pa mas potrèt por bishitá e Facebook page di Ministerio: Minister di Bishita na Oleander

 

Ministerio konserní