Bishita di Minister sra. Kajsa Ollongren di Ulanda - Informashon tokante Gobièrnu di Kòrsou Bo opinion

Notisia

Bishita di Minister sra. Kajsa Ollongren di Ulanda

Geplaatst op 10 April 2019 dor di Ministerio Tráfiko, Transporte i Planifikashon Urbano

Willemstad – Resientemente a tuma lugá un enkuentro entre e Minister di Asuntunan Interno i Relashon den Reino (BZK) di Ulanda sra. Kajsa Ollongren, Minister di Tráfiko, Transporte i Planifikashon Urbano, sra. Zita Jesus Leito, huntu ku Minister di Enseñansa sra. Marilyn Alcala-Walle, representantenan di entre otro Servisio pa Planifikashon Urbano (ROP), i organisashonnan riba e tereno di monumento i patrimonio. E enkuentro aki a tuma lugá den kuadro di desaroyo di nos sentro di siudat komo Patrimonio Mundial.

Mirando ku Willemstad ta riba lista di Patrimonio Mundial di UNESCO, tabata un bon oportunidat pa interkambiá di idea ku e mandatario Ulandes. Amsterdam su siudat Grachtengordel, kaminda e mandatario a traha, tambe ta riba lista di Patrimonio Mundial. Minister Jesus-Leito a mustra kon nos sentro di siudat por desaroyá i kuantu posibilidat positivo tin pa Gobièrnu i sektor priva traha huntu riba e desaroyo di esaki.

Despues di un presentashon di e Direktor di Sektor di Infrastruktura i Planifikashon Urbano, sra. Caroline Manuel, a sigui un rekorido den Otrabanda, Skalo, Fleur de Marie, i parti di Pietermaai. Bou di guia di e representantenan di bario, Minister Ollongren por a tende i haña un bista di kada bario individual i nan desaroyo.

Minister Ollongren di Ulanda a keda enkantá di loke e por a tuma nota di dje i a palabra ku lo sigui den kontakto spesialmente pa loke ta e aspekto di kuido i desaroyo di nos Patrimonio Mundial.

Ministerio konserní