Publiká riba 11 Desèmber 2018
Willemstad – Resientemente e hefe di e departamento di re integrashon di e prizòn na Schiphol na Ulanda, sra. Jessica Poel, a hasi un bishita di trabou na Sentro di Detenshon i Korekshon Kòrsou. Sra. Poel ta traha pa e Ministerio di Seguridat i Hustisia i e ta kai bou di Divishon Departamento di Institutonan Hudisial di e Gerensia ku ta responsabel pa e Régimen Spesial.
Durante di e bishita aki e a sera konosí ku e Tim di Maneho di SDKK. Tambe e a haña un rekorido den SDKK kaminda ku e por a tira bista den e diferente departamentonan.
Un di e departamentonan ku e a keda hopi enkantá i a ekspresá su orguyo pa ku e trabounan ku SDKK a bini ta desplegá ta loke ta wòrdu hasí den e asina yama
“Vocatial Building”. Akinan hopi di e trayektonan di resosialisashon ta tumando lugá.
Sra. Poel a keda enkantá ku entre otro e proyektonan di kosementu. Tambe loke a kapta su atenshon tabata e premio ku últimamente un kliente di SDKK i su tim a gana den kuadro di e premionan ku Curaçao Innovation and Technology Institute ku a wòrdu otorgá na luna di novèmber último. Ta trata di e premio Social Innovation Award, kaminda s.r Zahir Dalnoot i su tim a logra bai ku e premio máksimo aki pa loke ta trata inovashon sosial ku a tuma lugá den SDKK.
E kombersashon ku sra. Poel tambe a bai tokante un posibel kolaborashon entre prizòn Schiphol i SDKK pa loke ta trata método-, metódika- i intervenshonnan den kuadro di resosialisashon di e klientenan den SDKK i tambe na Ulanda.
SDKK lo por siña hopi di e manera ku nan ta traha i nan di SDKK. Realidat ta ku na Ulanda, for di aña 2012 a bini ta sera diferente prizòn i institutonan di detenshon, paso nan enfoke ta mas riba e parti di tratamentu i korigí e komportashon di e detenido.Esaki ta kana pareu ku seshon-, kurso- i treinen nan di personal di e prizònnan pa nan realisá i komprondé kiko ta e importansia di resosialisashon i e funshon di e trahadónan den esaki. Importante ta pa e klientenan haña alternativanan presentá durante di nan detenshon pa evitá ku nan ta bolbe kometé un delito i asina bolbe bini den kontakto ku hustisia.
