Notisia

WILLEMSTAD – durante su mishon resientemente na Hulanda, Minister di Enseñansa, Siensia, Kultura i Deporte sra. Marilyn Alcalá-Wallé a realisá un bishita na un skol speshal sekundario Aurum College, bou di liderazgo di sr. Niels Krol. E skol aki ta un skol sekundario speshal pa muchanan entre 12-20 aña, riba nivel HAVO/VWO. Pa por haña akseso na e skol e alumno mester tin un asina yamá “toelaatbaarheidsverklaring (TLV)”, esta un deklarashon ku por atmití e alumno na e tipo di skol speshal aki.

Aurum College ta ofresé enseñansa speshal riba nivel HAVO/VWO na alumnonan ku tin e diagnóstiko den e espektro di outismo o retonan psikológiko similar. E alumnonan aki ta haña guia èkstra durante nan formashon na skol di manera ku nan por desaroyá nan mes talentonan. Aurum College ta usa un konsepto nobo di enseñansa den koperashon ku IVIO@school (IVIO/ Instituut voor Individuele Ontwikkeling) ku ta usa un metodología di enseñansa na distansha den kombinashon ku un mèntor i dosentenan di Aurum College mes. E alumnonan ta pasa èksamen di estado (staatsexamens) pa optené nan sertifikado i diploma riba nivel HAVO i VWO.

Minister Alcalá-Wallé a haña un bon impreshon i idea di e tipo di skol aki, su forma di traha ku alumnonan i e posibilidatnan ku e ta brinda e alumnonan den un ambiente seif i sigur. E impreshonnan na e skol por fungi komo inspirashon pa e ‘Cluster’ 4 skol ku Gabinete Rhuggenaath ta trahando ariba pa por sirbi e gruponan speshal tambe mas mihor posibel. Na Kòrsou tin un trayekto ta kanando pa mehorá pisibilidatnan pa Enseñansa Speshal.

E grupo di trabou, esta e Plataforma pa Enseñansa Speshal na Kòrsou ya tin e maneho pa skol speshal den konsepto. Tambe e grupo di trabou a traha riba e lei pa Enseñansa Speshal, ku próksimamente ta bai kana su kaminda pa Parlamento trata. Tambe ya Minister Alcalá-Wallé a apuntá e e skol Oranjeschool/ Rebound na Oranjestraat kaba pa e hóbennan speshal aki. Aworaki e grupo di trabou ta sigui kana e trayekto pa brinda nos hóbennan di enseñansa speshal tambe mihor oportunidat.

—

KOMUNIKASHON