Publiká riba 15 Yüni 2018
Kòrsou habri pa hasi negoshi ku Hulanda
Willemstad – Kòrsou tin hopi posibilidat pa invertí den diferente sektor. Komershantenan na Hulanda kier eksplorá mas i mas posibilidatnan pa invertí. Ku esaki komo punto di salida, promé minister di Kòrsou Eugene Rhuggenaath i minister presidente di Hulanda Mark Rutte, ta organisá un konferensia pa invershonistanan. E konferensia ‘Bon Bini for business’ ta tuma lugá 21 di yüni 2018 na Den Haag, Hulanda.
Durante e konferensia, ku ta dura un dia, lo papia tokante posibilidatnan pa hasi negoshi entre Kòrsou i Hulanda. Esaki pa stimulá kresementu ekonómiko duradero. Meta ta pa diskutí konkreto ki posibilidatnan tin pa stimulá i fasilitá negoshi den Reino.
Den koperashon ku entre otro e ministerio di Desaroyo Ekonómiko di Kòrsou, organisashon di dunadónan di trabou VNO/NCW i Kas di Kòrsou na Hulanda a invitá entre otro for di Kòrsou CPA, Damen Shipyards, Aqualectra, CTB, CINEX i CDM pa presentashonnan i seshonnan pa konosé otro di aserka. E kompanianan aki ta representá entre otro e sektornan marítimo, turismo i energia duradero.
Banda di e seshonnan menshoná, promé minister Rhuggenaath i minister presidente Rutte lo kompartí nan vishon pa loke ta trata e posibilidatnan di hasi negoshi den Reino i asin’ei krea kuponan di trabou. Minister di Desaroyo Ekonómiko Steven Martina tambe lo duna un presentashon den kual e ta dibulgá e plannan riba e tereno di desaroyo ekonómiko.
Di banda di Hulanda lo partisipá sekretario di estado pa asuntunan di Reino señor Raymond Knops, representantenan di Buitenlandse Handel (BZ), Rijksdienst voor Ondernemend Nederland (RVO), MKB Nederland i tambe representantenan di institutonan sientífiko manera TNO i Universidat di Wageningen.
