Boneiru i Kòrsou ta ankra kolaborashon den un akuerdo di hermandat - Informashon tokante Gobièrnu di Kòrsou Bo opinion

Notisia

Boneiru i Kòrsou ta ankra kolaborashon den un akuerdo di hermandat

Geplaatst op 08 March 2020 dor di Ministerio Asuntunan General i Promé Minister

WILLEMSTAD – Boneiru i Kòrsou ta bai traha mas estrecho ku otro. Esei ta e kontenido di un ʹAkuerdo di Hermandatʹ ku Promé Minister Eugene Rhuggenaath a firma ku Diputado Elvis Tjin Asjoe. Firmamentu di e akuerdo a tuma lugá riba djabièrne 7 di mart na Fòrt Amsterdam, kaminda sr. Rhuggenaath a invitá sr. Tjin Asjoe.

E akuerdo ta menshoná diferente tema di importansia kaminda e dos islanan, ku antes tabata forma parti di Antia Hulandes, por saka ganashi si nan traha huntu i asina duna un impulso na kada isla su desaroyo duradero. Entre otro riba tereno di komèrsio i industria, evaluashon di e transporte di produktonan entre e islanan sin mester paga impuesto ni derecho di importashon, mehorashon di konektividat entre e islanan, promoshon di turismo duradero i interkambio di konosementu riba tereno di enseñansa, salú, gobernashon i mas. 

Segun Promé Minister Rhuggenaath, “Nos tin un laso di hermandat fuerte paso nos islanan i nos hendenan ta konektá histórikamente, familiar i kultural. Nos por saka hopi mas probecho mutuo dor di kombiná forsa riba diferente tema. Esaki ta un promé paso i seguidamente nos lo sigui konkretisá e oportunidatnan den gobièrnu i ku partnernan den komunidat”. 

Diputado Tjin Asjoe tambe ta konvensí ku“nos por tin hopi mas na otro den nos afan pa logra desaroyo duradero, si nos kolaborá i kompartí konosementu i eksperiensia riba diferente area di interes komun.”

Promé ku e restrukturashon polítiko na 2010, Kòrsou i Boneiru a traha evidentemente huntu riba hopi tereno, pero ora a desmantelá Antias na òktober 2010, mayoria di e kombenionan entre e dos islanan a yega na un final outomatikamente. Tantu Promé Minister Rhuggenaath di Kòrsou, komo Diputado Tjin Asjoe di Boneiru ku a bini ku e inisiativa ta di opinion ku, despues di dies aña, e momentu a yega pa un aserkamentu mas profundo riba tereno gubernamental pero tambe pa stimulá kolaborashon riba tur nivel di komunidat na e dos islanan.  

Ministerio konserní