Publiká riba 10 Ougùstùs 2026
WILLEMSTAD – Djaluna 10 di ougùstùs 2026 a tuma lugá apertura ofisial di e bootcamp “Un Snechi di Hustisia”, un inisiativa di Ministerio di Hustisia den estrecho kolaborashon ku Kuerpo Polisial Kòrsou, Brandweer Kòrsou i Sentro di Detenshon i Korekshon Kòrsou (S.D.K.K.).
For di tempran den mainta, mas ku 80 hóben entusiasmá a mèldu na Mancamp pa kuminsá ku un eksperensia intensivo di kuater dia. Durante e periodo aki e partisipantenan lo keda interná na Mancamp i lo sigui un programa varia, ku ta kombiná teoria, práktika, disiplina, trabou den grupo i eksperensianan relashoná ku e diferente profeshonnan den kadena di hustisia.
Meta di “Un Snechi di Hustisia” ta pa duna hóbennan un oportunidat úniko pa eksperensiá di serka kiko ta nifiká pa traha den un organisashon di hustisia. Na mes momento, e bootcamp ta permití nan konosé e diferente profeshonnan, responsabilidatnan i retonan ku ta forma parti di trabou diario di polis, bombero i agente di seguridat den S.D.K.K.
Durante e seremonia ofisial di apertura, sr. Gerold Daantje a hiba palabra den representashon di Minister di Hustisia. Tambe sr. Raymond Ellis, Hefe di Kuerpo Polisial Kòrsou, sr. Ludwin Maria, Hefe Interino di S.D.K.K., i sra. Ana Rodriguez, Komandante di Brandweer Kòrsou, a dirigí palabra na e partisipantenan.
Den nan mensahe na e hóbennan, a pone énfasis riba e balor di disiplina, responsabilidat, perseveransia, kolaborashon i servisio na komunidat. E profeshonnan den kadena di hustisia ta eksigí no solamente konosementu i kondishon físiko, sino tambe integridat, determinashon i kapasidat pa aktua korektamente bou di preshon.
Despues di e parti ofisial, e programa a sigui ku diferente presentashon i introdukshon pa prepará e partisipantenan pa loke ta spera nan durante e kuater dianan. E hóbennan lo haña tantu konosementu teóriko komo eksperensia práktiko bou di guia di instruktor- i profeshonalnan ku diariamente ta aktivo den Kuerpo Polisial, Brandweer i S.D.K.K.
Durante e próksimo dianan, e partisipantenan lo eksperensiá diferente aspekto di e trabou ku e tres organisashonnan aki ta hasi diariamente. Banda di esaki, nan lo enfrentá diferente ehersisio ku ta eksigí trabou den grupo, komunikashon, disiplina, kondishon físiko, perseveransia i kapasidat pa sigui instrukshon.
[FIN DI KOMUNIKADO]
