BPD ku ‘workshop’ den kuadro di formulashon di un maneho integral di integridat - Informashon tokante Gobièrnu di Kòrsou Bo opinion

Notisia

BPD ku ‘workshop’ den kuadro di formulashon di un maneho integral di integridat

Geplaatst op 01 March 2020 dor di Ministerio Maneho di Gobernashon, Planifikashon i Servisio Públiko

Willemstad – Minister di Gobernashon, Planifikashon i Servisio Públiko (GPS), sr. Armin Konket, tumando na konsiderashon e falta di kapasidat den e ministerio mes pa traha di forma intenso i dirigí riba maneho integral di integridat pa Kòrsou, a aseptá ku dos man e oferta di Think2DO Institute pa duna e ministerio asistensia. Den e kuadro aki a organisá resientemente un seshon den forma di un workshop. A pidi funshonarionan di gobièrnu i di sektor privá ku tin di aber ku e tema di integridat pa bini huntu pa tuma nota di e trabounan realisá te ainda. Alabes pa duna nan remarke/sugerensianan al respekto di moda ku por sigui traha riba un maneho integral inkorporá den un ‘Sistema Nashonal di Integridat pa Kòrsou’.

Nesesidat di un kuadro integral ta evidente
Minister Konket na apertura di e seshon a trese dilanti ku tin relashon dirèkt den e grado di konfiansa ku pueblo tin den instansianan di gobièrnu i e grado di integridat di e instansianan. Aki el a referí na tantu integridat di e empleadonan públiko komo na integridat di funshonamentu di e respektivo organisashonnan. “Falta di integridat no ta keda reflehá únikamente den aktonan koruptivo di un empleado, pero ta keda determiná tambe pa struktura i prosesonan ku ta yuda tene kosnan ku ta pasa skondí. Falta di transparensia ta tera fértil pa mal uso di posishon i mal uso di poder.  Esaki na su turno ta kondusí na deskonfiansa i na mes momentu oumento di e riesgo ku un siudadano ku no por konfia ku instansianan di gobièrnu ta trat’é di un forma honesto, ta rekurí e mes na aktonan deshonesto pa yega na e produkto/servisio ku e mester. Situashonnan den kua tantu den gobièrnu komo den komunidat aktonan koruptivo ta tuma lugá ta kondusí na un pais kaminda no ta bai tin repartishon hustu di loke pais ta produsí ni tampoko progreso. Ta p’esei ta nesesario pa traha ku urgensia na un ‘Sistema Nashonal di Integridat pa Kòrsou’.”

Koperashon ku Think2DO Institute
Think 2DO Institute tin komo mishon pa mobilisá ekspertisio i ideanan pa duna un man den e proseso di formulá maneho na Kòrsou. Ku e meta pa Kòrsou bira un pais próspero i atraktivo ku personanan bon eduká ku ta biba ku otro den harmonia.  Tambe pa aportá na gobernashon i desishonnan ku ta basá riba bon investigashon, basá riba dato i ku ta mutuamente akordá.  Ta a base di esaki Think2DO Institute i minister Konket a yega na un entendimentu pa traha huntu pa yega na un maneho integral inkorporá den un ‘Sistema Nashonal di Integridat pa Kòrsou’.  E promé fase di e koperashon aki ta dirigí riba forma e kuadro ku ta hasi posibel pa promové i garantisá integridat den sektor públiko. A base di resultado di e workshop ta sigui duna e maneho i e sistema kontenido i forma.

Ministerio konserní