Brantwer Kòrsou a lansa su wèpsait nobo - Informashon tokante Gobièrnu di Kòrsou Bo opinion

Notisia

Brantwer Kòrsou a lansa su wèpsait nobo

Geplaatst op 11 June 2020 dor di Ministerio Hustisia

Willemstad.- Dia 08 di yüni 2020, minister di Hustisia, Quincy Girigorie, a lansa e wèpsait
nobo di Brantwer Kòrsou. Esaki ta un paso fundamental den e trayektoria pa digitalisá e
prosesonan di e organisashon.

Ademas di duna informashon tokante e historia i tareanan dentro di Brantwer Kòrsou, e
wèpsait aki ta hasi e eksperensianan ku e prosesonan sivil di e instansia mas efisiente ainda
pa e siudadanonan di Kòrsou i ta trese e prosesonan aki mas serka di nan alkanse. Entre e
funshonnan moderno di e wèpsait tin ku solisitantenan ku ta aspirá pa bira parti di e
organisashon por manda nan CV via di e wèpsait. Tambe personanan ku a eksperensiá un
kandela na nan propiedat por yena un aplikashon pa deklarashon di kandela i manda esaki
pa Brantwer Kòrsou mediante e wèpsait mes. Banda di e funshonnan menshoná
bishitantenan di e wèpsait por ‘download’ un kantidat amplio di dokumento i foyeto ku
Brantwer Kòrsou ta poseé relashoná ku prevenshon di kandela.

“Nos ta hopi kontentu ku e desaroyo aki i nos ta sumamente entusiasmá pa presentá nos
wèpsait nobo na e pueblo di Kòrsou. Nos ta kontentu di por fasilitá un servisio èkstra na nos
komunidat ku e gran paso aki pa modernisá nos prosesonan. Nos ta konsider’é un honor i un
privilegio pa no solamente reskatá e siudadanonan di nos komunidat for di peliger, sino
tambe prevení e peliger na promé instante. E wèpsait aki lo yuda nos enormemente pa
stimulá i logra esaki”. E wepsait aki ta nos ta miré komo e brug di komunikashon entre nos
komunidat i e servisio di brantwer, esaki segun komandante di Brantwer Kòrsou.

E wèpsait a keda trahá pa Profound, un agensia destaká den digitalisá prosesonan dentro di
impresa i tambe produktonan digital destaká. “Nos a traha e wèpsait aki pa Brantwer Kòrsou
ku plaser i nos ta hopi satisfecho ku e resultado final. Nos ta mira esaki komo un adelanto
klave den e proseso pa konbertí Kòrsou den un nashon ku ta hasi bon uso di teknologia pa
yuda su siudadanonan”, segun Boudino de Jong, Managing Director na Profound.

Bishitá awe mes i eksplorá tur e posibilidatnan nobo ku Brantwer Kòrsou ta ofresé riba nos
wèpsait: www.brandweercuracao.cw.

 

Ministerio konserní