Brantwer Kòrsou ta forma su propio instruktornan pa fortalesé e kuerpo - Informashon tokante Gobièrnu di Kòrsou

Notisia

Hustisia
 

Brantwer Kòrsou ta forma su propio instruktornan pa fortalesé e kuerpo

Publiká riba 13 Òktober 2026

Willemstad – Brantwer Kòrsou a kuminsá ku un formashon pa instruktor, den kua diesun (11) empleado ta partisipá. Ku e inisiativa aki, e kuerpo ta invertí den su propio personal, ku e meta di desaroyá instruktornan ku den futuro por duna formashon i entrenamentu na nan koleganan.

E formashon ta bou di guia di sr. Frits Faber, i tin un durashon di aproksimadamente sinku luna i ta konsistí di lèsnan semanal. Banda di konosementu tékniko, e partisipantenan ta siña kon pa transmití nan konosementu i abilidatnan di manera kla i profeshonal. Pa esaki ta hasi uso di material di e formashon di “Hulpverlener”, entre otro riba kombatimentu di kandela i protekshon personal.

Brantwer Kòrsou tin e intenshon di organisá un segundo grupo di formashon, pa asina otro empleadonan ku a inskribí tambe por haña e oportunidat di desaroyá nan mes komo instruktor. Den e selekshon di e partisipantenan, a tene kuenta ku e nesesidatnan di e kuerpo i e dedikashon di e empleadonan. Ku nos instruktornan propio, Brantwer Kòrsou por organisá mas formashon i entrenamentu internamente, mantené konosementu den e kuerpo i garantisá kontinuidat den preparashon di su personal.

E trabou di bombero ta eksigí konosementu, disiplina i preparashon kontinuo. P’esei, invertí den formashon di personal no ta un luho, sino un nesesidat pa por sigui garantisá un servisio di kalidat i seguridat na komunidat di Kòrsou. Brantwer Kòrsou ta felisitá e diesun partisipantenan ku e paso aki den nan karera i ta deseá nan hopi éksito durante e formashon.

[FIN DI KOMUNIKADO]