Buki relashoná ku Aña di Ka'i Òrgel. E Ka'i Mai” - Informashon tokante Gobièrnu di Kòrsou Bo opinion

Notisia

Buki relashoná ku Aña di Ka’i Òrgel. E Ka’i Mai”

Geplaatst op 08 December 2019 dor di Ministerio Enseñansa, Siensia, Kultura & Deporte

Buki nobo di ka’i òrgel riba merkado:

WILLEMSTAD – Gobièrnu resientemente a produsí i publiká e promé buki den kuadro di e selebrashon di e Aña di Ka’i Orgel. E promé ehemplar di e buki a wòrdu entregá na sra. Rosarita Fecunda-Gosepa di 97 aña di edat.  Minister di Enseñansa, Siensia, Kultura & Deporte sra. Marilyn Alcalá-Wallé a hasi entrega di e buki na sra. Rosarita (mihó konosí komo Rosarita, Rosa, Shon Ros, Mai Rosa, Tantan Ros, Nana) komo ku e ta e promé dama ku a kumpra su propio ka’i òrgel i tabata organisá fiesta di baile di ka’i òrgel na kas di su mayornan. E buki ta un bunita kompilashon di e historia kultural rondó di nos herensia di ka’i òrgel.

Manera ya ta konosí, riba 29 ougùstùs 2018, aña 2019 a keda proklamá komo aña di piano di silender: Kaha di Òrgel. E maneho di Gabinete Rhuggenaath a keda preskribí den e akuerdo di gobernashon “Sakando e máksimo di e potensial di Kòrsou 2017-2021” di 10 mei 2017 i alabes den e programa di gobernashon. E trayekto aki ta e parti di nos herensia kultural musikal ku ta di importansha pa e konosementu den kuadro di Nation Building. Den e marko aki gobièrnu a pone 3 prioridat ku ta: konsientisashon di nos komunidat i nos historia riku den e konteksto korekto, stimulá arte i kultura na nos skolnan i promoshon di eskspreshon kultural.

Sektor di Kultura i Deporte den e lus aki a organisá diferente aktividat pa duna kontenido na e prioridatnan huntu ku Kas di Kultura i vários organisashon mas. Gobièrnu huntu ku diferente instansia ta sigui traha riba e konsientisashon i dokumentashon di nos kultura i historia pa nos komunidat di awor i di futuro ku e meta pa nos sigui traha riba nos identifikashon propio, konservashon di nos herensia i realse di nos norma i balornan. P’esei e ta buki aki mester keda mirá komo un dokumentashon pa perpetuá e informashon pa nos futuro generashon i alabes enrikesé nos historia musikal bou di nos suidadanonan. Den e buki aki famia di Sra. Rosarita Fecunda-Gosepa ta konta e enbolbimento di Sra. Rosarita den e mundu di ka’i òrgel.

Ministerio di Enseñansa, Siensia, Kultura & Deporte den persona di Minister sra. M.Alcalá-Wallé ta gradisí famianan sra. Elka Walter-Elizabeth, sr. Cornelis (Nelis) Gosepa i sr. Riles (Ridi) Gosepa, sra. Minerva Oudegroen, sra. Mayda Pieters-Gosepa i sr. Elvio Grotestam ku a yuda traha riba e trayekto aki di kurason. Tambe un danki ta bai na sra. Herta Parabirsing, sra. Nidia Rosaria, sra. Jessica Damon ku ta kordiná e Aña di ka’i orgel i Sektor di Kultura i Deporte i Kas di Kultura.

Gobièrnu di Kòrsou ta sigui traha riba konsientisashon i dokumentashon di nos Kultura i historia pa nos komunidat di awor i di futuro ku e meta pa nos sigui traha riba identifikashon propio, konservashon di nos herensia i realse di nos norma i balornan.

KOMUNIKASHON.

Pa mas potrèt por bishita e página sosial di Facebook di Ministerio: Buki E Ka’i Mai relashoná ku kaha di òrgel

Ministerio konserní