Publiká riba 17 Novèmber 2022
Willemstad – E tremendo buki ‘Willemstad Werelderfgoed: Kleurrijke stad aan een natuurlijke haven’ a keda publiká na mei 2022 den kuadro di selebrashon 25 aña Willemstad riba lista di Patrimonio Mundial di UNESCO. Esaki awor ta disponibel na Kòrsou tambe komo un ‘collector’s item’ úniko i memorabel.
Uitgeverij Matrijs a traha huntu ku Ministerio di Trafiko, Transporte i Planifikashon Urbano (VVRP) riba e kontenido. Tur e outornan di e buki ta yu Kòrsou, òf a biba na Kòrsou i ta duna splikashon di kada un di e 4 barionan di nos Sentro di Siudat.
Den e buki aki, tin potrètnan i imagennan masha bunita ku ta duna bida na e historia úniko, i situashon aktual, di nos Willemstad.
E buki aki ta unu den un seri di bukinan di tur patrimonio mundial di Reino Hulandes, i por a realisá esaki, danki na kontribushonnan di Stichting Werelderfgoed Hulanda, Stichting Monumentenzorg Curaçao, Stichting Monumentenfonds Curaçao, Ministerio di Enseñansa, Siensa, Kultura i Deporte, VVRP.
E buki ta na benta na Kòrsou na Mensing Caminada i Bruna Retao. Tur suidadano òf turista ku ta deseá na atkerí e buki aki, lo tin den nan koleshon un parti balioso di nos historia, ku ta mundialmente rekonosé.
