But di 2500 florin pa konstrukshon ilegal den área konservá
Publiká riba 06 Mei 2024
Willemstad – Resientemente, PTH a hasi un kontrol den área di Sun Set Heights i a bin konstatá konstrukshon ilegal den área konservá (‘conserveringsgebied’). PTH a traha un prosès verbal pa e doño den e kaso aki, konforme artíkulo 9 inisio 4 di Kòrsou su lei ‘Eilandelijk Ontwikkelingsplan Curaçao’ EOP (A.B. 1995, 36).
Konforme e lei aki, ta prohibí pa konstruí den área konserva sin pèrmit di konstrukshon otorgá pa Minister di Tráfiko, Transporte i Planifikashon Urbano (VVRP).
Den e lei aki, tin stipulá tambe ku Gobièrnu por duna esun ku ta hasi su mes kulpabel na konstrukshon sin pèrmit, un but di 2500 florin pa konstrukshon den área konservá.
E doño di e konstrukshon a presentá dilanti Hues, despues ku el a risibí
su prosès verbal, i Hues a dikta ku e but di 2500 florin ta keda bálido. E doño
pues awor mester paga pa e echo di a konstruí den área konserva.
Konforme artíkulo 32 inisio 1 di nos lei Eilandsverordening Ruimtelijke Ontwikkelingsplanning Curacao (EROC AB 1990, no. 6) e but máksimo pa e tipo di aktonan aki ta 5000 florin. Tambe por risibí un kastigu máksimo di prisòn di 2 luna.
PTH ta hasi un apelashon na komunidat pa konstruí na òrdu. Sòru tin e pèrmit di konstrukshon promé ku kuminsá traha, i tambe pa e tereno ta unu otorgá i apto pa konstrukshon.
