Publiká riba 04 Òktober 2026
WILLEMSTAD – Ofisina Sentral di Statistik (CBS) a duna rekonosementu na seis kolega pa nan añanan di servisio dediká na Gobièrnu di Kòrsou: Sean de Boer (30 aña di servisio), Arnold Rooi (30 aña), Lorette Ford (25 aña), Glenda Varlack (25 aña), Roeland Dreischor (25 aña) i Vanessa Valks (25 aña).
Durante nan añanan na CBS, e seis hubilarionan a eksperensiá diferente desaroyo i kambio den e organisashon. Nan a adaptá na maneranan nobo di traha, a kontribuí na diferente proyekto i investigashon, i a kompartí nan konosementu i eksperensia ku otro kolega.
Kada un di nan a duna nan propio kontribushon na funshonamentu i desaroyo di CBS. Nan trabou, perseveransia i sentido di responsabilidat a yuda CBS sigui brinda Kòrsou informashon estadístiko konfiabel, ophetivo i relevante.
Durante e selebrashon, e atenshon no solamente a bai na e kantidat di aña di servisio, sino spesialmente na e personanan tras di e añanan ei. E interim sekretario-general di Ministerio di Maneho di Gobernashon, Planifikashon i Servisio Públiko, señor Marshandly Helmijr, a risibí e hubilarionan i a rekonosé nan esfuerso i dedikashon pa ku nan añanan den servisio i el a ortogá nan un sertifikado di apresio. Na mes momento a reflehá riba nan trayektoria, e diferente funshonnan desplegá i e eksperensianan i amistatnan ku nan a forma den transkurso di tempu.
Gobièrnu di Kòrsou i personal di CBS ta gradisí tur e 6 hubilarionan sinseramente pa nan kompromiso, nan aporte i nan añanan di servisio den Gobierno di Kòrsou, pero partikularmente na CBS.
