Notisia

Willemstad: Ofisina Sentral di Statistik (CBS) di Kòrsou ta presentá un publikashon nobo basá riba datonan di Senso 2023 ku ta konsentrá riba Salú i Limitashon.

Durante di Senso 2023 a hasi diferente pregunta tokante kon salú e persona ta sinti su mes.
E publikashon ta duna un panorama amplio di e estado di salú na Kòrsou. Tambe e ta deskribí e diferensia di nivel di salú segun edat, género, situashon sosial i otro karakterístika, pa logra un bista mas kompleto i profundo di nos situashon di salú. E rapòrt ku a wòrdu publiká awe ta konsentrá spesífikamente riba kuater tópiko prinsipal:

1. Persepshon di salú (zelf-gerapporteerde gezondheid)
2. Limitashon i abilidatnan funshonal
3. Malesa i kondishon króniko
4. Kobertura di seguro médiko

Algun punto ku ta destaká ta:

• Salú segun propio persepshon | 84.4% di partisipantenan a kalifiká nan salú manera bon òf hopi bon, miéntras ku 10.7% a duna un kalifikashon di mas o ménos, i 2.3% a indiká ku nan salú ta malu te hopi malu. Hende hòmber (85.7%) a mustra un persepshon mas positivo di nan salú kompará ku hende muhé (83.3%).
• Limitashon i abilidatnan funshonal | 8.2% di personanan ku tin 15 aña òf mas a indiká ku nan tin a lo ménos un limitashon funshonal. Limitashonnan ta dominá mas tantu bou di hende muhé ku 9.2%; Ora klasifiká e limitashonnan den diferente kategoria, nos ta haña e siguiente resultado:

– Entre personanan di 65 aña òf mas, 24.5% di hende muhé i 19.3% di hende hòmber a indiká ku nan tin un tipo di limitashon.
– Bou di esnan ku a finalisá únikamente e promé nivel di edukashon, 16.6% a indiká di tin tin un limitashon. Miéntras ku esaki ta 3.5% bou di personanan ku a finalisá nivel 4 di edukashon.
– Den grupo ku ta ekonómikanamente inaktivo, 16.7% ta indiká di tin un limitashon, kompará ku 1.9% di esnan ku ta traha.

• Malesa króniko i/o kondishon | Di e tur respondente, 33.2% ta indiká ku nan tin un òf mas malesa króniko i/òf kondishon. Esnan ku ta wòrdu raportá mas ta: preshon haltu (19%), diabétis mellitus (8.4%) i asma (3.4%).
• Seguro di malesa | Den total, 97.3% di e respondentenan durante senso 2023 tin kobertura di un òf mas forma di seguro. E tipo di seguro mas komun ta BVZ (Basis Verzekering Ziektekosten / SVB Seguro Basiko), ku ta kubri 85% di e poblashon sigurá.

E análisisnan den e publikashon aki ta fundamental pa komprondé bienestar di nos siudadanonan i pa fasilitá desishon basá riba sifra den área di salú públiko, kuido i maneho sosial.

E publikashon ‘Health and Disabilities’ ta aksesibel tantu riba e website ofisial di CBS: www.cbs.cw komo riba e website di Senso 2023: senso.cbs.cw.

Ku e publikashon aki, CBS ta reafirmá su kompromiso pa suministrá estadístika basá riba datonan konfiabel i transparensia, ku e meta pa kontribuí na e desaroyo sostenibel di Kòrsou.

MAS NOTISIA

Ministerio konserní: Maneho di Gobernashon, Planifikashon i Servisio Públiko