Publiká riba 06 Yüli 2026
WILLEMSTAD – Durante e último Reunion General di Akshonistanan (AVA) entre e minister di BPD, e Konseho di Komisarionan (RvC) i e direktiva di CORE N.V., a deliberá tokante e progreso di e kompania i diferente asuntu aktual. E reunion entre e akshonista, konseho di komisarionan i e direktiva a resaltá e importansia di un diálogo aktivo, e importansia di semper tin un ‘good corporate governance’ i un kolaborashon konstruktivo entre e akshonista, e supervisornan i e direktiva.
Ademas, durante e reunion a tuma un paso importante pa eliminá retraso den e proseso formal di toma di desishon. Despues di un periodo di vários aña sin un Reunion General di Akshonistanan, pa diferente motibu, a trata i aprobá e kuentanan anual di diferente aña fiskal, i a otorgá discharge na e direktiva i e Konseho di Komisarionan pa e maneho i supervishon durante e añanan en kuestion. Ku esaki, un parti importante a keda logra i e siklo regular di reunionnan ku akshonistanan a keda re-establesé.
Durante e reunionnan tambe a pone énfasis riba e posishon fuerte ku CORE N.V. a logra den su segmento di merkado aktual. Ku un organisashon kompakto i efektivo, e kompania a logra realisá kresementu sostenibel, probechá oportunidatnan den merkado di forma efektivo i fortalesé mas su posishon den e sektor. E kompania ta distinguí su mes pa medio di un manera di traha orientá riba resultado, fleksibilidat i un enfoke kla riba inovashon.
E perspektivanan pa e periodo ku ta bin ta positivo. Ta sperá ku CORE N.V. lo sigui fuerte i ku próksimamente lo introdusí produkto i solushonnan inovador pa respondé na e nesesidatnan i oportunidatnan den merkado.
“CORE N.V. ta mustra ku grandura no ta determiná impakto. Un kompania salú, inovador i finansieramente fuerte ta mihó prepará pa invertí den su servisio, den kreashon di trabou i den e desaroyo kontinuo di nos ekonomia. Esaki ta e balor sosial ku nos, tin dilanti di nos,” asina Minister di Maneho di Gobernashon, Planifikashon i Servisio Públiko, Minister Shalten Hato a enfatisá. Promé ku klousura e reunion, Minister Hato a ekspresá un palabra spesial di gradisimentu na señora Gerda Isenia-Rosalia, ku durante 28 aña a duna liderazgo na CORE N.V. huntu ku su ekipo. E kompromiso i dedikashon durante 28 aña ta sigur un di e faktornan importante den e desaroyo i éksito di e kompania.”
[FIN DI KOMUNIKADO]
