Publiká riba 19 Sèptèmber 2023
Willemstad – Resientemente Cpost International N.V. a entregá i presentá su Kuenta Anual 2022 na Minister Charles Cooper di Ministerio di Tráfiko, Transporte i Planifikashon Urbano. Durante e presentashon, gerensha di Cpost a motivá e enfoke di e kompania pa baha e gastunan operashonal dor di eliminá desperdisio, pa medio di proyektonan ku ta elevá efisiensia i implementashon di inovashon den su prosesonan i servisio. Modernisashon di e servisionan tradishonal di Cpost lo kana paralélo na e afan pa diversifiká e servisionan ofresé segun e nesesidat di e klientenan lokal i e merkado internashonal.
Gerensha di Cpost International N.V., huntu ku representante di Hunta di Komisario di e kompania, a entregá e Kuenta Anual 2022 di Cpost na Minister Cooper, despues ku e kuenta anual a keda kontrolá dor di ouditor eksterno Ernst & Young. Durante e interkambio ku Minister Cooper, gerensha di Cpost a elaborá tokante e desaroyonan postal riba nivel mundial i e impakto ku esakinan tin riba servisio postal tradishonal. Manera ta konosí, mundialmente e volumen di post tradishonal ta bahando ku tur e konsekuenshanan finansiero ku esaki ta trese ku n’é. Den e kuadro aki, Cpost bou di maneho di e CEO nobo señor Jervhes Josephia, ta enfoká su esfuersonan riba mehorashon i diversifikashon di su servisionan pa klientenan, tantu lokal komo internashonal. Pa halsa e servisionan tradishonal, Cpost ta dirigí su atenshon riba mehorashon di e kalidat di entrega di post, modèrnisashon di prosesonan interno i aun mas enfoke riba su servisio di kargo aereo i marítimo. Ku un maneho mas duradero, Cpost ta dal paso dirigí riba eliminashon di desperdisio, eskoho pa energia alternativo pa baha gastu i solushonnan di pago inovativo pa medio di aplikashonnan ku ta fasilitá e proseso di pago pa e kliente di Cpost. Ehèmpelnan di pasonan ku Cpost a tuma ta e Community Mail Box posishoná den diferente area rònt Kòrsou. I riba e area di kompras via pòst, klientenan aktualmente por hasi uso di e aplikashonnan ‘Cpost App’ i ‘ValtPay’, ambos kreá pa transformá e manera kon klientenan di Cpost ta manehá nan paketenan i hasi pago ‘online’ via eWallet Valtpay, kual lo fasilitá pago di paketenan risibí via Punto Mio i EuroMio.
CEO di Cpost, señor Jervhes Josephia, ta splika ku Cpost ta hasiendo su gran esfuerso pa fortifiká su kompetividat den e mundu postal lokal i internashonal, primordialmente pa medio di e servisio ku e kliente tin nesesidat p’é den e mundu di awe i mañan. “Den e kuenta anual di Cpost por nota un resultado positivo moderá i nos gastunan operashonal ta bahando aktualmente, konforme nos akshonnan. Sinembargo, ta imperativo pa nos keda enfoká riba efisiensia, inovashon i diversifikashon pa balansá e pèrdida di entrada postal i ofresé e produkto i servisionan ku ta na benefisio di e nesesidat di e kliente i e merkadonan lokal i internashonal.” Meta di Cpost ta pa bira un kompania profeshonal di servisio pa su klientela. Próksimamente Minister Cooper lo konvoká e reunion general di akshonista pa trata e relato anual di Cpost.
