Publiká riba 22 Mart 2024
Willemstad – Kòrsou, komo pais den e area di Karibe, tambe a duna atenshon na ‘Carib Wave’ riba dia 21 di mart ku a pasa. Carib Wave ta e dia kaminda e paisnan den Karibe ta duna èkstra atenshon na evaluashon di preparashon pa un posibel tsunami den e region Karibense. CRBo (Crisisbeheersings & Rampenbestrijdingsorganisatie di Kòrsou) a hasi un kombinashon entre un simulashon di alarmá pa e diferente miembro i un tayer tokante di tsunami, bou di guia di Servisio Meteorológiko.
Tsunami ta preskribí den e lista di posibel riesgo pa Kòrsou. Tin prueba sientífiko ku den pasado ta tin un òf mas tsunami ku a yega Kòrsou. Esaki ta hasié importante pa prepará i konsientisá pa un posibel tsunami den futuro. Durante di e tayer e miembronan di CRBo, akompaña dor di representantenan di Krus Kòrá i di Citro, a evaluá kiko tur mester sosodé den future serkano, pa hasi Kòrsou mas mihó prepará pa un eventual tsunami. A papia entre otro di e nesesidat di un sistema di alarma, di lokashonnan sufisiente haltu kaminda hende por buska refugio pa un tsunami, rutanan pa skapa i kon pa hasi esakinan visibel. Tambe a papia di kon pa bai eduká i informá tokante di tsunami.
E resultadonan di e tayer i e diferente rekomendashon di e partisipantenan mester resultá den un Plan di Maneho di Tsunami, kompilá dor di Meteo i direktorado pa Kontrol di riesgo i maneho pa Kalamidat (DRR). Den su ròl di ‘Opperbevelhebber’ ora tin un kalamidat, Promé Minister Gilmar Pisas, tambe a bishitá e aktividat fruktívero. E mandatario a hasi uso di e oportunidat di ėkspresá su gratitut na e diferente miembronan di CRBo, ku ta hasi kada biaha mas tantu esfuerso pa protehá Kòrsou i su poblashon kontra di posibel riesgonan i kalamidat.
