‘Curaçao Export Council’ ta un echo! - Informashon tokante Gobièrnu di Kòrsou Bo opinion

Notisia

‘Curaçao Export Council’ ta un echo!

Geplaatst op 17 March 2021 dor di Ministerio Desaroyo Ekonómiko

WILLEMSTAD – Djaluna, dia 15 di mart, a tuma lugá lansamentu ofisial di ‘Curaçao Export Council’ (CEC). ‘Curacao Export Council’ ta e struktura ku próksimamente ta bai karga desaroyo i implementashon di e Strategia Nashonal di Eksportashon di Kòrsou, pero tambe ta traha riba kompetitividat, mehorashon di e klima di invershon i e klima empresarial na Kòrsou. Minister Steven Martina, komo presidente di ‘Curaçao Export Council’, a dirigí e reunion di dia 15 di mart último kaminda e lansamentu a tuma lugá. E reunion akí a konta ku partisipashon di funshonarionan di ‘International Trade Centre’ (ITC) for di Ginebra, Suisa i representantenan di tantu sektor públiko komo sektor privá di Kòrsou. Konsiderando e oumento di kasonan di COVID-19 na Kòrsou durante e último dianan, MEO a opta pa tene e lansamentu akí di un forma virtual.

E ‘Curaçao Export Council’ a keda instituí komo un kuerpo di maneho pa guia den implementashon di e Strategia Nashonal di Eksportashon i tambe di un forma kolektivo i inklusivo traha riba mehorá kompetitividat i guia e reformanan ku ainda tin ku tuma lugá den e kuadro akÍ. ‘Curaçao Export Council’ ta un di e akshonnan konkreto ku a resultá for di e ‘Strategic Trade Development Roadmap’ ku a keda aprobá pa Konseho di Minister dia 22 di aprel 2020 i ku aktualmente ta den pleno implementashon.

“E ‘Curacao Export Council’ no ta un “talk shop”, pero el lo ta un organisashon ku ta konstantemente den akshon pa por logra e metanan proponé den e Strategia Nashonal di Eksportashon”, Minister di Desaroyo Ekonómiko Dr. Steven Martina a indiká.

‘Curacao Export Council’ ta konsistí di un ‘steering committee‘ ku na e momentu akí ta e diferente ministernan huntu ku nan respektivo ministerionan. Minister di Desaroyo Ekonómiko ta presidente di e ‘Curaçao Export Council’. Ademas tin un sekretariado ku ta konsistí di funshonarionan di e Sektor di Relashonnan Ekonómiko Internashonal di MEO fortifiká ku funshonarionan di e otro sektornan di MEO, pero tambe representantenan di CTB, KvK i Cinex.
Huntu ku e lansamentu di e ‘Curaçao Export Council’, algun akshon konkreto tambe a keda disidí na final di e reunion di djaluna último. E akshonnan akí na nan turno lo mehorá e kompetitividat i fasilitá hasimentu di negoshi na Kòrsou.

E promé temanan ku ‘Curaçao Export Council’ ta bai atendé i solushoná ta
habrimentu di un kuenta bankario;
pèrmitnan di trabou pa ekspertonan;
e-payments pa stimulá e-commerce;
registrashon di empresa;
kostonan di elektrisidat;
kosto i kalidat di Internet;
kolekshon di data i;
propiedat intelektual di empresanan.
‘Curaçao Export Council’ su enfoke ta pa sigui traha riba mehorashon di e ambiente pa hasi negoshi na Kòrsou. Den kuadro di esaki, MEO lo sigui stimulá mas partisipashon di sektor públiko, privá i tambe di komunidat!

Ministerio konserní