Notisia

Curacao Hospitality and Tourism Training Centre

Ta proyektá ku apertura ta tuma lugá na òktober 2023

WILLEMSTAD – Ministerio di Enseñansa, Siensia, Kultura i Deporte di Kòrsou huntu ku Ministerio di Enseñansa, Kultura i Siensia di Hulanda den estrecho koperashon ku ROC Mondriaan i Direktivanan di skolnan envolví ta trahando pa yega na Curacao Hospitality and Tourism Training Centre ku koperashon di tur isla den Karibe. E meta di e institushon di Curacao Hospitality and Tourism Training Centre ta pa krea fasilidat di práktika igual na e realidat den merkado laboral i sirbi komo un sentro/hotel relaistiko di aprendisahe. Asina studiantenan por risibí estudio, preparashon, guia i stazje den e fasilidat aki mes. E kolaborashon ku ROC Mondriaan ta sostené i fasilitá kapasidat di preparashon di e studiantenan. E studiante lokal i di regio (Boneiru, Aruba i Islanan Ariba) por disfrutá di un guia insentivá den e sentro di preparashon aki, ku enseñansa dirigí riba kompetensia, kual ta enrikesé e kuríkulo aktual.

Na inisio di e trayekto aki e aspirashon tabata pa kana muchu mas duru, pero tendiendo kuenta ku e distansia, diferensia di orario, kultura i efektonan di esakinan riba e komunikashon a pone ku ámbos partido mester a ahustá pa optimalisá e kolaborashon pa por alkansá e metanan. Na e momentu aki tin un bon komunikashon riba tur nivel pa realisá e hotèl di aprendisahe i práktika aki ku e proyekshon pa hasi apertura na òktober 2023.

Tambe a konfirmá kolaborashon ku Universidat di Kòrsou (UoC) pa loke ta trata e estudio Bachelor of International Tourism and Hospitality Management, un estudio nobo i ku ta forma parti di e fakultat sosial ekonómiko di UoC. Pa ku esaki, ya ta traha riba e liña di aprendisahe kontinuo, di moda ku konekshon entre e estudionan sekundario (MBO/SBO) ku e estudio riba nivel di Bachelor (HBO) ta kontinuá na un forma bon aliniá ku benefisio pa e studiante. Konsiderando ku ora e pasa su preparashon den e hotèl di aprendisahe aki, lo e tin bentaha kompetitivo i esaki lo aselerá su estudio riba nivel di HBO.

Trabounan di preparashon di e fasilidat na e hotèl na Parasasa ta avansando. Ta preparando 43 kamber, inkluso algun sùit. Den futuro lo amplia e kapasidat di e hotèl di praktiká aki tambe segun e plannan. E apertura di e promé fase ta planiá pa luna di òktober 2023. Den kuadro di preparashon ya tabatin interkambio i mobilidat di personal di enseñansa lokal, ku personal di enseñansa di ROC Mondriaan. Na diferente okashon dosentenan di Nilda Pinto i Maris Stella SBO tabatin biahenan di interkambio na ROC Mondriaan na Den Haag, i dosentenan di ROC Mondriaan a bini Kòrsou ku e mesun propósito. Remarkabel ta ku a base di e interkambionan ku a tuma lugá ROC Mondriaan a konfirmá den diferente enkuentro ku e programanan ofresé pa institutonan di enseñansa na Kòrsou ta bon di nivel. Esaki ta algu ku mester keda kuidá i konsolidá ku bon fasilidat di práktika, bon relashon ku e sektor di hospitalidat i turismo i ainda mas enfoká riba desaroyo di kompetensia.

Ta imperativo enfatisá ku ROC Mondriaan NO ta kuminsá un skol na Kòrsou, komo ku lei di enseñansa Hulandes i lokal simplemente no ta permití esaki. Esaki Direktor di Enseñansa di ROC Mondriaan, sra. Wilma Verhoeks, a suprayá den e enkuentro ku e delegashon di Kòrsou. Esaki kontrali na informashon eróneo ku sa sirkulá. E intenshon di e kolaborashon ta fortifikashon mutuo, i enrikesimentu di e kuríkulo aktual.

Akshonnan importante ku palabrá durante e enkuentro:

• Ta formalisá e kolaborashon entre ROC Mondriaan i Direktivanan di Skol Katóliko i Públiko den un akuerdo (MOU);
• Den luna di òktober próksimo ta proyektá pa hasi apertura di promé parti di e hotèl di práktika na Parasasa tur kos kana konforme e planning;
• Gobièrnu di Kòrsou ta hasi esfuerso pa duna sosten na importashon di material i inventario pa e hotèl di práktika;
• Konforme e akuerdo di kolaborashon Gobièrnu di Kòrsou di Kòrsou entrante 2024, ora presupuesto 2024 keda aprobá pa Staten, lo duna un kontribushon na e institutonan pa maneho di e proyekto aki, di moda ku por tin personal dediká na fasilitá e proyekto aki;
• Direktivanan di skol, ROC Mondriaan i Gobièrnu di Kòrsou lo inisiá un proyekto piloto pa aprendisahe dirigí riba kompetensia, den e kuadro legal aktual;
• E parti Karibense di Reino Hulandes (CASt i BES) lo tuma e inisiativa pa instituí un konsorsio di institutonan di enseñansa profeshonal pa fortifiká e kolaborashon i definí strategia pa loke ta trata estudio profeshonal.

—

KOMUNIKASHON

** riba e potrèt athunto por tuma nota di e delegashon di Kòrsou ku a reuní ku ROC Mondriaan na Hulanda

MAS NOTISIA

Ministerio konserní: Enseñansa, Siensia, Kultura & Deporte