Curaçao SDG Action Week: un siman di enfoke riba metanan sostenibel mundial (SDGs) - Informashon tokante Gobièrnu di Kòrsou Bo opinion

Notisia

Curaçao SDG Action Week: un siman di enfoke riba metanan sostenibel mundial (SDGs)

Geplaatst op 26 September 2021 dor di Ministerio Maneho di Gobernashon, Planifikashon i Servisio Públiko

WILLEMSTAD –  Komishon Nashonal di Kòrsou pa Agènda 2030 i e Metanan pa Desaroyo Sostenibel, fasilitá dor di Gobièrnu di Kòrsou, ta organisá e di dos edishon di “Curaçao SDG Action Week” ku ta tuma lugá dianan 27 di sèptember te ku 1 di òktober 2021. Un siman kargá ku seshonnan virtual ku ta trata tópikonan relatá na e Metanan pa Desaroyo Sostenibel (Sustainable Development Goals – SDGs) pa Kòrsou. Pueblo en general ta haña e oportunidat di partisipá i sa mas di SDGs, kon leu nos ta i kiko ta e oPhetivonan pa Kòrsou.  

Seis aña pasá, henter mundu a bai di akuerdo ku e “Agènda 2030 pa Desaroyo Sostenibel” ku ta konsentrá riba un kantidat di 17 Meta pa Desaroyo Sostenibel (SDGs). E agènda ta enserá un Plan di Akshon dirigí riba Hende, Planeta, Prosperidat i Pas ku mester keda realisá a traves di kolaborashon entre partnernan. E mishon prinsipal ta pa mehorá kalidat di bida i transformá mundu. Sin laga niun hende keda’tras.  

Kòrsou tambe a komprometé su mes pa logra e Metanan pa Desaroyo Sostenibel. Pa inisiá e proseso lokalmente, Gobièrnu di Kòrsou na 2018 a aprobá e “Roadmap for SDG implementation” i asina presentá e kuadro di ophetivonan pa avanse den desaroyo sostenibel di Kòrsou. E SDG Roadmap pa Kòrsou ta enfoká riba 6 prioridat: Kombatí ku pobresa (SDG 1), Mihó Salú i Bienestar (SDG 3), Edukashon di Kalidat (SDG 4), Energia duradero (SDG 7), Kresementu ekonómiko i Trabou desente (SDG 8) i Bida bou di laman (SDG 14).

“Curaçao SDG Action Week” e aña akí ta enfoká riba Revishon Nashonal Boluntario a traves di reunionnan di mesa rondó pa interkambio ku diferente stakeholders, komienso di e Akademia di SDG i kreashon di un plataforma di SDG Húbenil pa Kòrsou. 

Implementashon di e Agènda 2030 i SDGs ta un responsabilidat di hinter komunidat. P’esei Komishon Nashonal di SDG na Kòrsou ta invitá tur departamentu di Gobièrnu, kompanianan lokal, organisashonnan sosial, organisashonnan di hóbennan i tur interesá pa inskribí libremente pa partisipá.

Registrashon ta posibel via e página di Facebook: SDG Curaçao 2030 i via https://www.curacao2030.cw/events/2030-sdg-action-week. Por klek riba e lenk i wak e programa kompletu i asina skohe na kua seshon ta deseá di partisipá. Pa mas informashon bishitá nos wèpsait www.curaçao2030.cw. Tambe por tuma kontakto ku nos libremente via Instagram òf un di nos plataformanan virtual.


Ministerio konserní