Curaçao SDG Action Week: un siman di enfoke riba metanan sostenibel mundial (SDGs) - Informashon tokante Gobièrnu di Kòrsou Bo opinion

Notisia

Curaçao SDG Action Week: un siman di enfoke riba metanan sostenibel mundial (SDGs)

Geplaatst op 20 September 2020 dor di Ministerio Asuntunan General i Promé Minister

WILLEMSTAD –  Komishon Nashonal di Kòrsou pa Agènda 2030 i e Metanan pa Desaroyo Sostenibel fasilitá dor di Gobièrnu di Kòrsou, ta organisá e promé edishon di “Curaçao SDG Action Week” ku ta tuma lugá dianan 28 di sèptèmber te ku 2 di òktober 2020. Un siman kargá ku seshonnan kompletamente virtual ku ta trata tópikonan relatá na e Metanan pa Desaroyo Sostenibel (Sustainable Development Goals – SDGs) pa Kòrsou. Pueblo en general ta haña e oportunidat di partisipá i sa mas di SDGs, kon leu nos ta i kiko ta e ophetivonan pa Kòrsou.

Sinku aña pasá, henter mundu a bai di akuerdo ku e “Agènda 2030 pa Desaroyo Sostenibel” ku ta konsentrá riba un kantidat di 17 Meta pa Desaroyo Sostenibel (SDGs). E agènda ta enserá un Plan di Akshon dirigí riba Hende, Planeta, Prosperidat i Pas ku mester keda realisá a traves di kolaborashon entre partnernan. E mishon prinsipal ta pa mehorá kalidat di bida i transformá mundu. Sin laga niun hende keda’tras.

Kòrsou tambe a komprometé su mes pa logra e Metanan pa Desaroyo Sostenibel. Pa inisiá e proseso lokalmente, Konseho di Minister na 2018 a aprobá e “Roadmap for SDG implementation” i asina presentá e kuadro di ophetivonan pa avanse den desaroyo sostenibel di Kòrsou. E SDG Roadmap pa Kòrsou ta enfoká riba 6 prioridat: Kombatí ku pobresa (SDG 1), Mihó Salú i Bienestar (SDG 3), Edukashon di Kalidat (SDG 4), Energia duradero (SDG 7), Kresementu ekonómiko i Trabou desente (SDG 8) Bida bou di laman (SDG 14).

“Curaçao SDG Action Week” ta konta ku ekspertisio di oradornan lokal i internashonal durante diferente pènel i seshonnan virtual interesante. Algun orador ku lo forma parti di e programa ta kordinadó di SDG Nederland Sandra Pellegrom, kordinadó di SDG Aruba Jocelyne Croes, Direktor di Global Island Partnership Kate Brown, representante pa e Programa di Desaroyo di Nashonnan Uní (UNDP) na Trinidad and Tobago Randi Davis, i kordinadó regional di UNESCO pa edukashon Faryal Khan. Lo tin diferente presentashon di kolaboradornan di diferente Ministerio ku lo elaborá kon Kòrsou su prioridatnan nashonal ta kuadra ku e Agènda 2030 i SDGs i lo tin seshonnan di mesa rondó virtual kaminda personanan por duna input kon tur persona i instansia lokal por kontribuí na implementashon lokal di e metanan global.

Implementashon di e Agènda 2030 i SDGs ta un responsabilidat di hinter komunidat. P’esei Komishon Nashonal di SDG na Kòrsou ta invitá tur departamentu di Gobièrnu, kompanianan lokal, organisashonnan sosial, organisashonnan di hóbennan i tur interesá pa inskribí libremente pa partisipá.

Registrashon ta posibel via e página di Facebook: SDG Curaçao 2030. Pa mas informashon, bishitá nos wèpsait www.curaçao2030.cw. Tambe por tuma kontakto ku nos libremente via Instagram òf un di nos plataformanan virtual.

Ministerio konserní