Publiká riba 30 Ougùstùs 2024
Willemstad – Minister Charles Cooper huntu ku e Servisio di Planifikashon Urbano (ROP) a otorgá ofishalmente un pèrmit di konstrukshon na Direktor General di Dutch Caribbean Air Navigation Service Provider N.V. (DC-ANSP), Sra Micilia Albertus-Verboom, pa konstrukshon di un edifisio èkstra pa e funshonnan operashonal.
E edifisio aki lo bira parti di e totalidat di ofisina prinsipal di DC-ANSP situá na Seru Mahuma, área destiná pa industria.E konstrukshon ta plania pa terminá den 2026.
E proyekto aki ta marká un kontribushon den nos ekonomia, dor di kreashon di trabou durante e fasenan di konstrukshon. Tambe ampliashon di DC-ANSP ta nifiká oportunidatnan di kresementu pa e organisashon i implementashon di teknologianan inovativo den futuro pa sigui mehorá e servisio di nabegashon di tráfiko aéreo.
