Deklarashon di Promé Minister riba e último desaroyonan entre Kòrsou i Hulanda. - Informashon tokante Gobièrnu di Kòrsou Bo opinion

Notisia

Deklarashon di Promé Minister riba e último desaroyonan entre Kòrsou i Hulanda.

Geplaatst op 07 January 2021 dor di Ministerio Asuntunan General i Promé Minister

Ko-suidadanonan,

Nos lucha diario pa wanta plamamentu di COVID-19 i mitigá su efektonan, kombiná ku otro retonan di tur dia, no a kita nos atenshon for di e trayekto tan importante ku nos ta kanando pa realisá e asina yamá “landspakket”. Manera ta konosí nos a yega na un base di kolaborashon ku Hulanda pa nos ban realisá proyekto i ahustenan nesesario ku lo kontribuí na krea un situashon sosial-ekonómiko mas sólido pa Kòrsou i asina alsa kalidat di bida di nos pueblo Esaki komo parti di e sosten finansiero ku nos a risibí.

Den e lastu kuartal di 2020, Gobièrnu a traha na e plan di akshon i tambe agènda di ehekushon. E plan di akshon tin metanan bon kla definí i fihá den tempu. Di e forma akí por monitoriá progreso na un forma efektivo i duradero. E agènda di ehekushon lo definí den muchu mas detaye kon ta bai ehekutá tur proyekto den kada área di atenshon di e ‘landspakket’.

Un delegashon di Ministerio di Asuntunan Interno i di Relashonnan den Reino (‘BZK’) tabata na Kòrsou den desèmber pa forma parti di e proseso akí. Huntu ku representantenan di nos ministerionan i ekspertonan lokal, a hasi inventarisashon di trayektonan ku ya tin andando pa asina por aliñeá esakinan ku e plan di akshon. Ta bon pa remarká ku pa mayoria trayekto Gobièrnu ya tin plannan trahá ku únikamente mester keda ehekutá awor, loke sigur ta fasilitá nos pa por dal bai lihé pa logra resultado na benefisio di nos pais.

Tin 49 tema ku a keda identifiká den e plan di akshon. Debidamente ta tene kuenta ku e kapasidat disponibel pa realisá e trabounan nesesario. Pa e motibu aki a skohe tambe pa delineá kiko ta prioridat i kuminsá ku 20 proyekto. Nos lo duna prioridat na entre otro invershon den nos enseñansa, sosten na empresanan pa garantisá kupo di trabou i fortifiká nos klima di invershon, merkado laboral i sistema hudisial. Entretantu ya por mira ku a duna kontenido na e resolushon ku nos a akòrdá pa klientenan di Girobank haña akseso na nan fondonan. Ku kada stap ku nos dal, nos meta ta pa krea un komunidat i pais mas fuerte i resiliente.

E responsabilidat pa realisá e diferente trayektonan ta keda den nos man. P’esei for di un prinsipio a envolví Minister i ministerionan pa liderá esaki. Timnan di trabou den e diferente ministerionan lo traha riba nan área di atenshon den e agènda di ehekushon. Den kaso ku mester di kapasidat adishonal lo buska esaki sea lokal mes òf kolaborá ku Hulanda.

Pa fin di yanüari tur plan di ehekushon mester ta kla. Mirando e forma enérgiko ku nos a bin ta traha den e último temporada, mi ta hopi optimista ku nos por logra e deadline akí.

Ami i mi Gabinete ta determiná pa realisá e diferente ahuste i trayektonan ku lo mester krea un mihó bida i bibá pa nos pueblo. Nos lo keda tene pia riba gas pa huntu nos dal e pasonan nesesario den bista di un mihó mañan pa kada un di nos. Lo mi keda informá tantu komunidat segun nos ta dal pasonan konkreto.

Mientrastantu, den e aña nobo akí, laga nos kada un kontribuí nos granito pa realisá e progreso i bienestar ku nos tur ta lucha p’e. Ban huntu sigui kana e kaminda pa logra reforma i desaroyo duradero pa futuro di nos Kòrsou.

Ministerio konserní