Notisia

Willemstad – Resientemente nos archivero nashonal a risibí e grato notisia ku desde awor e Deklarashon Universal di Archivo na papiamentu ta riba e wèpsait International Council on Archives (ICA). Den esaki Kòrsou ta sigui e 38 paisnan ku ya kaba a tradusí e deklarashon den nan idioma materno. Entre nan paisnan manera, Hulanda, Alemania, Kroasia, Gresia, Hungria, Ruanda i Indonesia.

 

E Deklarashon Universal di Archivo a keda adoptá dor di UNESCO durante nan di 36 Kongreso General dia 10 di novèmber 2011. Pa medio di e deklarashon aki ICA ke yuda halsa konsientisashon i komprendementu riba tereno di archivo. Ta hopi importante pa yega espesialmente na mandatarionan i otro personanan krusial riba tereno di archivo, pa asina yuda salbaguardiá archivonan di nan pais ku ta keda konsiderá komo tesoro di un nashon.

 

Dia 26 ougùstùs 2019 nos Archivo Nashonal lo selebrá su di 50 aña di eksistensia i publikashon di e deklarashon na papiamentu sigur ta un bon komienso di e aña hubilario aki. Alabes esaki ta konfirmá ku inisio  di “Archiefschool” na 2017 ta un bon desishon, mirando ku tradukshon di e deklarashon a keda hasí dor di studiantenan di “Archiefschool”. Via e link https://www.ica.org/en/the-universal-declaration-on-archives-is-now-available-in-papiamentu por yega mesora n’e deklarashon na papiamentu.

 

Pa medio di e grato notisia aki Archivo Nashonal ke inisiá su aña hubilario i alabes ke invitá pueblo di Kòrsou en general, pa huntu nos selebrá e aña aki. Pronto lo revelá e programa pa kana yega 26 di ougùstùs 2019 i despues klousurá e aña. Lo pone hopi énfasis riba aktividatnan ku por yuda enrikesé i fortifiká nos archivonan pa hopi 50 aña mas. 

 

 

 

 

 

 

 

 

 

——————————————–xxxXxxx———————————————–

 

Pa kontakto:

Glendalin William

Ministerio di Gobernashon, Planifikashon i Servisio Públiko

Plasa Horacio Hoyer 9

Tel.: 839-2427

Pa mas informashon yama Bentana di Informashon na:  0800-1515