Publiká riba 14 Novèmber 2022
Willemstad, 14 di Novèmber 2022 – Ayera e delegashon di Kòrsou enkabesá pa Minister Hato di Hustisia a sali pa asina asistí na e Universal Periodic Review (UPR) di e Konseho di Derecho Humano di e Organisashon di Nashonnan Uní (United Nations Human Rights Council). Alabes, komo ku Aruba i Sint Maarten tambe lo ta representá dor di nan Minister di Hustisia aya na Ginebra pa e UPR, e tres paisnan (Kòrsou, Aruba i Sint Maarten) a disidí di organisá un Reunion Hudisial Tripartito na Ginebra mes.
E UPR ta un mekanismo di evaluashon di Nashonnan Uní ku ta tuma lugá kada 4 aña. Durante e UPR e situashon di derecho humano di kada pais miembro di Nashonnan Uní lo keda evaluá. E proseso di UPR ku ta tuma lugá bou di ouspisio di e Konseho di Derecho Humano ta brinda tur pais e oportunidat pa presentá inisiativanan ku a tuma pa drecha e situashon di derecho humano den kada pais. Despues di e presentashon di kada pais, otro paisnan miembro di e organisashon di Nashonnan Uní por reakshoná i por duna rekomendashon unda nan ta mira espasio pa mehorashon.
Pa e UPR, kada pais mester entregá un rapòrt ku ta elaborá riba su propio situashon di derecho humano. Komo ku tin un limitashon pa e kantidat di tópiko ku por abordá den e rapòrt aki, kada pais mester skohe tópikonan relevante, i tambe ta di suma importansha pa indiká progreso di implementashon di kada rekomendashon ku a keda aseptá durante e UPR anterior. Riba dia 15 di novèmber e revishon di Reino Ulandes lo tuma lugá na Ginebra den presensia di Minister di Asuntunan Interior i Relashonnan den Reino i Ministernan di Hustisia di Kòrsou, Aruba i Sint Maarten. Promé ku partisipá na e UPR, Kòrsou, Aruba i Sint Maarten lo tene un reunion hudisial tripartito na Ginebra riba nivel Ministerial. Inisialmente e reunion aki mester a tuma lugá na Sint Maarten na luna di òktober, pero esaki no a tuma luga mas pa motibunan fuera di alkanse di kada pais.
Banda di esaki ta importante pa suprayá ku Minister Hato no solamente lo representá e Ministerio di Hustisia pero tambe e Ministerio di Enseñansa, Siensia, Kultura i Deporte di sr. Heydoorn, Ministerio di Desaroyo Sosial, Labor i Bienestar di sra. Larmonie-Cecilia, Ministerio di Salúbridat Públiko, Medio Ambiente i Naturalesa di sra. Pietersz-Janga.
