Notisia

DELEGASHON DI KORSOU PARTISIPANDO NA E DI 42 KONFERENSIA GENERAL DI UNESCO NA PARIS

WILLEMSTAD – Djamars último a tuma lugá apertura di e 42 Konferensia General di UNESCO na Paris, kaminda Kòrsou ta partisipando ku su propio delegashon komo miembro asosiá. E delegashon ta konsistí di Minister di Enseñansa, Siensia, Kultura i Deporte sr. Sithree van Heydoorn, Sekretario General di di Ministerio di ESKD sra. Susan Larmonie-van Heydoorn, Sekretario General UNESCO Kòrsou sra. Marva Browne i kolaborador di Kabinete di Minister sra. Roxanne Leeuw.

E delegashon a reuní ku e Asistente Direktor General sr. Anthony Ohemeng-Boamah enkargá ku e Komishonnan Nashonal huntu ku su tim, kaminda a elaborá riba e reunion di Caribbean SIDS pa Komishonnan Nashonal ku lo tuma lugá otro aña na Kòrsou ku e sosten di entre otro e Komishon Nashonal di Fransia i Canada. Un reunion sumamente fruktífero kaminda a toka e temanan di entre otro violensia na skolnan, kaminda UNESCO a informá riba un programa piloto ku a hasi na Jamaica i awor ta implementando esaki na St. Lucia. E intenshon ta pa introdusí esaki pa vários pais karibense. A la bes ta ofresé pa Kòrsou tambe haña e programa aki adaptá na nos situashon pa yuda ku e problema di violensia den skolnan.

Minister sr. S. van Heydoorn a tene su intervenshon durante e Konferensia na nòmber di Kòrsou kaminda el a para ketu riba e logronan ku pais a hasi durante e último dos añanan (despues di e Konferensia General di 2021) riba tereno di entre otro digitalisashon den enseñansa, deporte i kambio di klima su efektonan i tambe riba e programa di historia di sklabitut.

Otro reunionnan riba agènda ta ku e Asistente Direktornan General di Enseñansa i Kultura, i tambe ku e sekshon di deporte i ‘anti-doping’ den deporte. E konferensia ta tuma lugá kada dos aña i e aña’ki di 7 pa 22 di novèmber.
—
KOMUNIKASHON
• Athunto riba e potrèt di r-d Roxanne de Leeuw, Marva Browne, ADG PAX Anthony Ohemeng-Boamah, Minister Sithree van Heydoorn i Susan Larmonie-van Heydoorn
• Athunto intervenshon Minister Sithree van Heydoorn

MAS NOTISIA

Ministerio konserní: Enseñansa, Siensia, Kultura & Deporte