Bo opinion

Notisia

Den desaroyo di nos ekonomia tin espasio pa tur ku ke aportá na kresementu

Geplaatst op 29 January 2020 dor di Ministerio Desaroyo Ekonómiko

WILLEMSTAD- Djárason 29 di yanüari último Kòrsou tabata tin un total di 9869 turista krusero di bishita riba nos isla. Den kuadro di esaki Fundashon Marshe, den su tarea di maneho di marshenan den sentro di siudat , a disidí di duna un èkstra bida na e waf di Sha Capriles pa medio di un feria ku a sòru di brinda e bishitantenan aki un plachi  inolvidabel di nos sentro di siudat.

Ministerio di Desaroyo Ekonómiko(MEO) sin mas ta mira bek ku hopi satisfakshon i orguyo riba e aktividat aki. E feria aki a sòru di  duna un gran empuhe na dos pilar sumamente importante di nos ekonomia kual ta e pilar di empresarionan chikí i mediano pero tambe e pilar turístiko.
Ta un echo ku gran parti nos ekonomia lokal ta keda sostené dor di e labor i e esfuerso diario di empresarionan mikro, chikí i mediano ku ta lucha i duna di nan parti pa nos isla por sigui prosperá. Mirando e gran importansia di e sektor aki pa e desaroyo ekonómiko di nos pais, MEO ta kere firmemente den habri oportunidatnan kontinuamente pa e empresario aki tambe por desplegá e loke e ta ofresé i krese den e loke e ta hasi.

Fundashon Marshe, na  nòmber di MEO, ta karga e responsabilidat di atministrashon, mantenshon i maneho di tur aktividat i sitionan di marshe den nos sentro di siudat.
Den simannan tras di lomba Fundashon Marshe a hasi un yamada na tur (mikro i mini) empresario ku ta bende produktonan lokal pa inskribí i asina okupá un puesto djárason último den e feria organisá na Sha Caprileskade. For di 10or di mainta te ku 6or di atardi e waf tabata broma ku kultura, arte, músika i dansa.

Entre e (futuro) empresarionan presente, Fundashon Marshe a ekstendé un invitashon tambe na Sentro di Detenshon i Korekshon Kòrsou (SDKK). Durante e feria tabatin trabou di algun di esnan detené den e sentro tambe ku a keda desplegá i diferente produkto- i artíkulonan ku ta keda produsí dor di den e sentro den nan programa di resosialisashon. Entre otro tabata tei presente sr. Zahir Dalnoot kende a gana e premio di Social Innovation Award na aña 2019 ku produkshon di tas masha bunita for di materialnan resiklá i tambe otro (eks) detenidonan di SDKK ku a haña e chèns pa mustra nan potensial i nan talentonan durante e feria aki.

MEO ta kere firmemente ku den desaroyo di nos ekonomia tin lugá pa tur ku ke aportá positivamente na kresementu di nos pais. Kòrsou ta yen di talento i potensial. MEO ta konvensí ku kada turista ku a pasa na e waf di Sha Capriles a bolbe kas ku un bunita impreshon di e loke nos pais tin pa ofresé.

 

 

Ministerio konserní