Publiká riba 30 Yüni 2020
Willemstad – Ku e ahustenan nesesario na e nòrmal nobo i bou di guia di e guia di aktividatnan, sra. S. Llewellyn i L. Gibbes-Roojer, e Unidat di Korekshon sostené dor di henter Tim di Maneho i trahadónan a organisá dos momentu kaminda a pone e klientenan ku durante di e periodo di Covid-19 a sigui hasi nan trabou ku dedikashon pa asina e servisionan di parti kuminda i eis den SDKK por a sigui sin problema. Durante di e promé dia minister di Hustisia sr. Quincy Girigorie i pastornan lokal a hasi akto di presensia. E klientenan a hasi uso di e oportunidat pa hasi preguntanan kritiko na minister Girigorie i direktor di prizòn sr. U. Floran. E pastornan a stimulá e klientenan pa siña hasi eskohonan korekto den nan bida. Na final di e promé dia e klientenan a duna di konosé ku nan tin nesesidat na e tipo di intervenshonnan aki kaminda nan por ekspresá nan mes, hasi preguntanan, ekspresá nan preokupashonnan i wòrdu skuchá. E promé dia e klientenan a wòrdu partí den gruponan kaminda ku hopi entusiasmo (asta esnan ku nunka den nan bida a yega di kushiná) nan mes a prepará e kuminda ku tabata shoarma di galiña, pitsa, berdura i salada. Tur kos a wòrdu organisá den forma di bufèt. Na final tur kliente a yuda limpia. Ku orguyo nan e duna di konosé ku nan lo trata na pasa e eksperensia aki pa nan yunan.
Riba e di dos dia minister Hensley Koeiman i pastornan lokal a hasi akto di presensia. Durante di e dia aki minister Koeiman tambe a hiba kombersashon ku e klientenan tokante di e balor i responsabilidat di ta un tata den tempu di krísis. E pastornan a hasi entre otro orashon i a vosifera palabranan di aliento na e tatanan presente. Riba e di dos dia e grupo di klientenan aki tambe mes a kushina i asta nan a siña traha ‘cinnamon rolls’ di e guia di aktividatnan. E klientenan tabata orguyoso di por a pasa dor di e proseso aki i desaroyá nan mes. E esfera tabata positivo, edukativo i amabel. Tabata importante i bunita pa wak kon e klientenan por a traha huntu den un forma relahante i alabes orguyoso pa por para kushiná nan propio kuminda. Na final di dia a duna un palabra di elogio na e trahadó sr. A. Reiter ku entre otro ta guia e grupo klientenan aki.
Un danki ta bai na e doño di “Deli Nova” ku a yuda duna sosten pa por a ehekutá e aktividatnan aki konforme reglanan di SDKK.
