Publiká riba 25 Yüli 2018
WILLEMSTAD— Konforme e maneho di Minister di Hustisia sr. Quincy Girigorie, den e siklo pa duna informashon na pueblo di Kòrsou, dor di e diferente organisashonnan ku ta den e kadena hudisial, último a toka turno na Sentro di Detenshon i Korekshon (SDKK).
Un di e retonan di mas grandi i alabes un responsabilidat kompartí, ku e instituto tin ta pa kambia i/òf ahustá e imágen ku komunidat tin di aktual klientenan i esnan ku tin un kastigu di prizòn tras di lomba. Un imágen por sierto ta opstakulisá un aseptashon digno i real di e persona ku ya ta i a kumpli ku su kastigu. Durante di e programa radial na Z 86, miembronan di Tim di Maneho di SDKK huntu ku un kolega di Ofisina pa Ayudo na Víktimanan (Bureau Slachtofferhulp) a duna splikashon i un bista mas detayá pa loke ta trata e diferente aspektonan humano ku diariamente e instituto komo organisashon tin ku para ketu na dje i buska posibel solushonnan.
Minister Girigorie na kada okashon ku e haña e ta suprayá e importansia di e eksistensia di resosialisashon den un forma struktural, permanente i profeshonal den SDKK.
Durante di e programa e preokupashon a bini dilanti ku ta parse manera e edat di esnan ku ta kometé delitonan ta birando ora pa ora mas yòn. En bèrdat esaki ta un sintimentu ku ta eksistí. Echo ta ku kada un hóben ku kai den man di Hustisia ta unu di mas. Tambe a papia di e komportashon di e persona durante di su detenshon. Ku esaki e pregunta a surgi ku si e delito ku a wòrdu kometé por wòrdu mirá den e komportashon di e kliente. Hopi biaha na komienso di e detenshon klientenan sa hunga tòf i komportá nan mes tin ora na un manera robes. Durante di e periodo ku nan ta enkarselá i nan bin para realisá e konsekuensia di nan delito, e konsekuensia pa e víktima i/òf famia di e víktima, e konsekuensia pa su propio famia/yunan i tambe e kastigu ku e tin ku bai sinta, e komportashon sa i por kambia pa unu mas positivo.
Tin ku bisa ku e maneho di Minister Girigorie ta pa enfoká i krea posibilidatnan pa e hóben i èks-klientenan di SDKK. E proseso di krea posibilidatnan aki ta kana man na man ku e ehèmpel ku adultonan mester tin komo ròl modèl pa ku e hóbennan. Ku esaki a splika ku nos komo adulto ta esnan ku ta interaktuá ku e hóbennan durante i despues di nan kastigu. Ta p’esei ta primordial pa durante di e detenshon SDKK komo instituto kolektivamente ta mir’e komo un responsabilidat kompartí. Na promé lugá komo siudadano i na di dos lugá komo trahadó dui SDKK, pa durante di nos trabounan i nos esfuersonan pa resosialisá e hóben/personanan, pa nos hasi esaki konforme un konsenshi sano i hustu.
Si un kliente òf famia di un kliente tin rason, dun’e rason i atmití ku nos tambe komo hende i profeshonal por faya òf por ta robes. Niun hende no ta perfekto. Esaki ta loke nos ke logra serka nos klientenan tambe pa nan por mira i aseptá ora nan ta robes. Pa por yega na entre otro e proseso asina yamá ‘Hustisia Restorativo’. Esaki ta kaminda e persona ku a kometé un delito ta para ketu i realista kiko e, kon e i kua konsekuensia su akto tabatin pa su mes, su propio famia, e víktima, e famia di e víktima, pueblo di Kòrsou etcetera.
Ta p’esei durante di e siman di konferensia di trabou na mei último a para ketu i wak/skucha dikon ta importante pa SDKK sigui stimulá, motivá i asentuá relashon familiar durante detenshon. Sigur esun di esnan ku tin yu i esnan ku ta hóben. Na momentu ku un kliente ta pone balor na su famia e lo por komprondé e balor ku un víktima tin òf tabatin pa su famia ku a pèrd’e i/òf a keda mankaron pa motibu di e delito.
Tambe a para ketu na e responsabilidat di sindikato i nos prensa lokal. Echo ta ku mester salbaguardiá e derechinan di trahadónan i alabes e libertat di nos prensa. Un realidat tambe ta ku nos mester para ketu tambe na e deber di nos komo siudadano, komo empleado públiko i komo edukadó di nos pueblo. Si nos ke pa e proseso di resosialisashon di nos klientenan kana mas mihó ku awor aki ta e kaso, nos mester sigui ku e esfuersonan konhunto i nesesario pa prepará i ekipá e klientenan mentalmente pa asina nan por tin un mihó chèns riba un eksistensia balioso i duradero komo siudadano den komunidat. E ta un esfuerso konhunto ku mester kana pa nos por kombibí na un manera salú riba nos dushi isla Kòrsou.
