Publiká riba 15 Yüni 2018
Willemstad – Departamento di Reibeweis ku tambe ta un identidat di e Ministerio di Gobernashon, Planifikashon i Servisio Públiko kier informá siudadanonan riba tarifanan di produktonan pa eksámen. Ta importante pa kada siudadano ta bon informá pa por atendé su asuntunan efisiente i sin demorá.
Gobièrnu di Kòrsou den su maneho a stipulá konforme lei, tarifanan pa produktonan ku e ta brinda na pueblo. Ofisina di Reibeweis ke informá tur interesado ku di un forma òf otro forma tin ku drenta den kontakto ku nan relashoná ku eksámen.
Na momentu ku e siudadano ke pasa eksámen pa kore vehíkulo motorisá, e mester kumpra e asina yamá ‘Bewijs van Storting’. Esaki ta kosta NAf. 105,00. E ta prueba di pago ku ta kubri gastunan di e eksámennan. E dokumento aki tin un balides di 6 luna despues di e promé inskripshon pa pasa eksámen i e ta keda bálido 6 luna despues di kada eksámen.
E por keda usá 4 biaha i ku e siguiente kombinashonnan: 1 eksámen teorétiko i 3 eksámen práktiko, 2 teorétiko i 2 práktiko òf 3 teorétiko i 1 práktiko. Den kaso ku bo pèrdè e ‘Bewijs van Storting’ òf e kaduká mester paga pa un nobo.
Solamente ku un ‘Bewijs van Storting’ bálido, e siudadano por haña fecha pa eksámen (teorétiko òf práktiko).
Mester kumpra un ‘Bewijs van Storting’ pa kada kategoria den kua bo ta deseá pa pasa eksámen.
Un otro dokumento ku e siudadano mester, ta e ‘Commissieverklaring’. E dokumento aki ta kosta NAf. 20,00. Esaki ta e deklarashon ku ta indiká ku e shofùr tin e konosementu sufisiente pa manehá un vehíkulo motorisá di un di e kategorianan. Mester presentá ku e dokumento aki riba dia di eksámen práktiko. Ta rekordá tur persona ku tin ku pasa eksámen pa tuma tur nan dokumentonan serka e instruktor.
Sin e dokumentonan aki lo bo no por pasa eksámen. Si e siudadano pèrdè su sertifikado di teoria, e por (laga) pidi un kopia. No tin gastu mará na esaki.
Pa tur eksámen mester identifiká bo mes ku un medio bálido, sea sédula, pasport òf reibeweis di Kòrsou. Pa pasa eksámen kategoria A i B bo mester a kumpli 18 aña. Pa kategorianan C, D i E bo mester tin 21 aña. E medio di pago pa e eksámennan ta via di swaip òf un depósito di e montante korespondiente na ofisina di Giro riba #1100033. Pa mas informashon por yama Vergunningenloket departamento Bentana di Informashon na 0800-1515. Òf bishitá e wèpsait di gobièrnu ku ta: www.gobiernu.cw.