Derecho di dedukshon (‘aftrekrecht’) di 4.5% OB ta keda mantené - Informashon tokante Gobièrnu di Kòrsou Bo opinion

Notisia

Derecho di dedukshon (‘aftrekrecht’) di 4.5% OB ta keda mantené

Geplaatst op 18 October 2020 dor di Ministerio Finansa

WILLEMSTAD – Ministerio di Finansa ta informá ku e derecho di dedukshon di 4.5% Omzet Belasting (OB) ta keda mantené te na momentu ku e lei nobo ‘Algemene Bestedings Belasting’ (ABB) drenta na vigor dia 1 di yanüari 2021. 

Manera ta konosí, Gobièrnu di Kòrsou a hasi un fiansa di 126 mion florin serka Gobièrnu Hulandes pa duna sosten na empresa i kompanianan individual via di e areglo di NOW pa mantenshon di kupo di trabou.

Sinembargo, e sosten finansiero na tur ku a pèrdè trabou òf ta buska trabou i e grupo ku ta kobra ònderstant, a keda finansiá for di e presupuesto di Gobièrnu di Kòrsou mes. Pa sigui garantisá sosten finansiero na e grupo mas vulnerabel akí, Gobièrnu a tuma un desishon pa kuminsá ku e proseso pa eliminá e derecho di dedukshon di 4.5% di OB na entrada. E desishon aki mientrastantu a keda revoká.

Gobièrnu di Hulanda a komprometé pa pone fondo disponibel pa medio di un fiansa pa Gobièrnu di Kòrsou. Esaki ta pa por sigui duna sosten na e grupo ku a pèrdè trabou òf ku ta buskando trabou, i kobradónan di ònderstant.

Hopi ta esnan ku ta aserká Gobièrnu último dianan ku e pregunta ku si en bèrdat Gobièrnu a eliminá e derecho di dedukshon di 4.5% OB, pa motibu ku nan ta konstatá ku empresanan ta oumentando nan preis. Ta alegá ku empresanan ta hasi esaki pasobra Gobièrnu a eliminá e derecho di dedukshon. Pa aklarashon pues, e derecho di dedukshon di 4.5% di OB ta keda mantené te na momentu ku e lei di ABB drenta na vigor.

Ministerio konserní