Desaroyo den siglo 21
Publiká riba 23 Sèptèmber 2023
Willemstad – Ministerio di Enseñansa, Siensia, Kultura i Deporte a risibí bishita di vários profeshonal internashonal relashoná ku e tema di desaroyo moderno di siglo 21. Komo ku desaroyo di hende ta un prioridat den nos País, Minister Sithree van Heydoorn a dialogá i tene un presentashon chikí di nos sistema di enseñansa. Den kuadro di esaki Ministerio di ESKD huntu ku ekspertonan lokal a para ketu na e desaroyo edukashonal di adulto tambe. Den e reunion aki a partisipá diferente pais manera Hulanda, Bélgika, Lisboa, Portugal i Luthuania.
Siglo 21 a bai den un era di avansenan teknológiko i globalisashon sin presedente. E abilidatnan ku un tempu tabata sufisiente pa sigurá un trabou stabil no ta sufisiente mas. Pa keda kompetitivo i probechá e oportunidatnan ku nos tin dilanti, nos mester ekipá nos adultonan Ku un diferente set di habilidat di siglo XXI.
Na promé lugá, alfabetisá digital ta impresindibel. Den un mundu impulsá pa teknologia, e kapasidat pa nabegá riba hèrmèntnan i plataformanan digital no ta un opshon mas, pero fundamental. Nos mester sigurá ku nos adulto por usa teknologia pa kresementu personal i profeshonal. Pensamentu krítiko i abilidatnan pa solushoná problema ta igual di esensial. E kapasidat pa analisá problemanan kompleho, pensa Kreativo haña solushonnan inovativo lo diferensiá nos adultonan den un merkado laboral kompetitivo. Invertí den desaroyo di abilidat di siglo 21 den nos adulto ta un invershon den futuro di nos pais. E lo mehora empleo, impulsá diversifikashon ekonómiko i finalmente kondusí na un Pais mas próspero y resistente.
P’esei Minister Sithree van Heydoorn ta gradisí pa un kolaborashon internashonal di e tipo aki den kua nos pueblo por a eksplorá, eksperensiá i siña tokante posibel formanan pa promové i aktivá i rekonosementu di e abilidatnan di siglo 21 den edukashon di adulto. Inklushon di esaki por bira duradero dor di inkluí nos biblioteka lokal den e proyekto aki. Nos vishon ta pa envolví Biblioteka den fasilitashon i desaroyo di e habilidatnan menshoná anteriormente.
Konsiderando e bunita eksperensia ku e delegashon lokal tabatin den e asosiashon aki, Minister di ESKD ta hasi un apelashon na Gobièrnu, edukador nan, empleadonan pa uni den e esfuerso aki. Huntu nos por garantisá un futuro mas briante pa Kòrsou i su siudadano.
************************************
