Bo opinion

Notisia

Desaroyo di áreanan den haf i estímulo na empresario ta temanan sentral den konferensha di kolaborashon

Geplaatst op 19 January 2020 dor di Ministerio Asuntunan General i Promé Minister

WILLEMSTAD – Desaroyo di áreanan den haf di forma integral i stimulashon di aktividatnan ekonómiko ta pará sentral den e konferensha di kolaborashon ku ta tuma lugá di 20 pa 24 di yanüari na Rotterdam, Hulanda. Meta prinsipal di e konferensha ta pa konkretisá palabrashonnan di kolaborashon ku ta sirbi e empeño di Gobièrnu di Kòrsou pa aselerá desaroyo ekonómiko di pais. Tambe pa alineá i konkretisá diferente inisiativa lokal ku ya tin kaba pa ku desaroyo di haf ku prioridatnan riba término kòrtiku i largu.

Diferente kompanianan di Gobièrnu i privá lo bini huntu durante e konferensia pa delineá un Ruta Mayó (Road Map) ku metanan komún i interkambiá ku kompanianan na Rotterdam. E konferensia a ser fasilitá dor di Programma Management Organisatie (PMO) di Strategia di Kresementu pa Kòrsou i ta sostené metanan stratégiko di e pilar di kresementu ekonómiko. Minister Presidènt, Sr. Eugene Rhuggenaath i Minister pa Desaroyo Ekonómiko, Sra. Giselle Mc William ta kompañá e delegashon ku tin un programa ambisioso pero dirigí.

Durante e último bishita di Alkalde di Rotterdam Ahmed Aboutaleb na Kòrsou el a ekspresá e disponibilidat di Rotterdam pa kolaborá ku Kòrsou riba e área di desaroyo di haf i desaroyo sosial. E siudat di Rotterdam, meskos ku Kòrsou, a konfrontá sirkunstansianan ekonómiko difísil un tempu. Sinembargo, nan a sa di uza nan rekursonan, prinsipalmente e haf ‘Port of Rotterdam’, komo un katalisadó pa trese un kambio kompletu i surpasá hopi di nan retonan. Aworaki Port of Rotterdam ta un haf inovativo i e haf di mas grandi na Oropa. Komo tal, Kòrsou lo hasi bon uzo di e disponibilidat di Rotterdam pa kolaborashon. Por konsiderá e bishita di trabou aki komo un reakshon positivo pa yega na palabrashonnan konkreto tokante kolaborashon.

Manera menshoná, e enfoke lo ta prinsipalmente riba desaroyonan ekonómiko den haf, pero banda di esaki lo para ketu tambe na desaroyonan nobo pa stimulá inisiativa empresarial lokal manera por ehèmpel desaroyo di transishon modèrno di energia duradero i tambe ekonomia sirkulario. E bishitanan di trabou ta relatá na e temanan di enfoke aki i lo keda hasí na entre otro Ministerio pa Asuntunan Ekonómiko i Klima (Ministerie van Economische Zaken en Klimaat), TNO (Nederlandse Organisatie voor Toegepast Natuurwetenschappelijk Onderzoek), Blue City, Port of Rotterdam i Innovation Quarter. Port of Rotterdam ta un bon ehèmpel di stimulashon di transishon ekonómiko, desaroyo integral di haf, stimulashon di desaroyo empresarial, desaroyo di energia duradero i tambe ekónomia sirkulario.Di e forma aki Gobièrnu ta hasi esfuerso huntu ku kompanianan privá pa krea un sinergia sólido pa dal pasonan grandi pa stimulá desaroyonan ekonómiko nobo i inovativo den nos haf.

Ministerio konserní