Notisia

WILLEMSTAD – Minister di Enseñansa, Siensia, Kultura i Deporte (ESKD), sr. Sithree van Heydoorn, a yega na palabrashonnan ku e enfoke pa sigui alsa e desaroyo di nos atletanan. Minister a tene un reunion dia 28 di febrüari último, pa kòmbersá ku visepresidente di Komité Olímpiko Internashonal (KOI/IOC), sra. Nicole Hoevertsz riba e posibilidat pa traha huntu pa elevá nos deporte. Tambe, a hasi palabrashon pa sigui traha huntu ku Komishon Olímpiko Arubano (COA) pa yega na mas aktividatnan deportivo huntu. Durante e kombersashonnan akí, Kòrsou a keda representá no solamente pa Minister di ESKD, sr. Sithree van Heydoorn, pero tambe su kolaboradó di gabinete, sr. Errold Bishop i kolaboradó di maneho di ESKD, sra. Irelnety Copra. E Delegashon di Aruba a konsistí di e Presidente di COA, sra. Wanda Broeksema, direktor tékniko di COA, sr. Edmundo Osiano, liaison di COA, sr. Thakai Doran i representante di COA,sra. Perlishka Lockhart huntu ku e visepresidente di IOC. Konhuntamente partidonan a kòmbersá i deliberá ampliamente riba un manera pa yega na un mihó kooperashon riba e área deportivo.

Sra. Hoevertsz a duna un splikashon tambe tokante e difikultat pa splika e struktura estatal di nos paisnan na KOI/IOC. Pa un pais keda rekonosé dor di KOI konforme su statuto, e pais mester ta independiente i mester ta miembro di Nashonnan Uní. Mirando e situashon aktual di Kòrsou, ainda nos no ta kumpli ku e parti akí den e statutonan di KOI. Apesar di esaki, sra. Nicole Hoeverts a indiká ku mundu ta sigui desaroyá i no ta ekskluí e posibilidat ku KOI por kambia su statutonan den futuro. Aktualmente, Kòrsou por sigui partisipá den weganan di e otro organisashonnan manera CentroCaribeSport, ODESUR, CANOC i tambe Carifta i CCCAN. A keda palabrá, ku Kòrsou i Aruba ta bai traha huntu pa por sigui amplia e posibilidatnan pa nos deportistanan. E posibilidat pa deportistanan di Kòrsou por partisipá na Weganan Olímpiko den selekshon di Aruba ta keda vigente bou di algun kondishon palabrá. Minister enkargá ku Deporte, sr. Van Heydoorn, ta bai sinta ku Federashon Deporte i Olímpiko Kòrsou tokante e puntonan konkreto akí pa asina krea un relashon mas estrecho entre COA i FDOK.

Pa loke ta trata e Weganan di Reino (Koninkrijk Spelen), Minister van Heydoorn i Minister Croes di Aruba a yega na e akuerdo ku mester traha palabrashonnan konkreto huntu ku minister di deporte di Hulanda i otro entidatnan pa bolbe aktivá esaki. Minister van Heydoorn a indiká, ku Kòrsou tin e deseo pa ta e anfitrion di e próksimo Weganan di Reino. Aruba na su turno a bai di akuerdo ku esaki i huntu e otro paisnan lo traha un “position paper” pa ratifiká e kolaborashon entre paisnan pa ku organisashon i partisipashon na “Weganan di Reino”, den e “4 Landen Overleg” ku lo tuma lugá na luna di aprel próksimo na Hulanda. Meta di e Weganan akí lo ta pa fortifiká e lasonan deportivo den Reino i di un forma positivo konektá e hóbennan ku kultura (Deportivo) di e diferente paisnan. Esaki komo parti di integrashon kultural. Un ehèmpel di esaki ta “Youth Olympic Games”. Tambe a toka e punto tokante e posibilidat di sosten den e desishon pa membresia di pais Kòrsou na PANAM Sports. Sperando e desishon final di parti di PANAM Sports, a yega na un akuerdo pa huntu trese un proposishon na Panam Sports pa lanta un fondo pa sostené paisnan no miembro, manera entre otro Kòrsou den desaroyo deportivo.

Ministerio di ESKD por mira bèk riba un reunion eksitoso i fruktífero pa ku e área di deporte entre e paisnan Aruba i Kòrsou.

MAS NOTISIA

Ministerio konserní: Enseñansa, Siensia, Kultura & Deporte