Publiká riba 09 Mei 2023
Willemstad- Riba djamars, 9 di mei último, partnernan den sektor turístiko aki na Kòrsou a bini huntu pa duna un bista riba desaroyonan den e sektor durante aña 2022 i e promé kuartal di 2023. Presente durante e konferensha di prensa akí tabata Minister di Desaroyo Ekonómiko, sr. Ruisandro Cijntje, huntu ku representantenan di su ministerio i partnernan di Ofisina di Turismo di Kòrsou (CTB), Curaçao Hospitality & Tourism Association (CHATA) i Curaçao Ports Authority (CPA). Aña 2022 tabata un aña di rekuperashon pa rònt mundu despues di e efektonan di COVID-19 i pa e sektor turístiko na Kòrsou esaki no tabata un eksepshon. Den aña 2022 tras di lomba tabata e promé aña ku bida a kuminsá bai bèk na normal despues di e restrikshonnan di COVID-19 i pa gran parti di e sektor turístiko aña 2022 a trese desaroyonan sumamente positivo.
Durante e konferensha di prensa akí, CTB a trese dilanti ku na aña 2022 Kòrsou a risibí un total di 489 mil turista di estadia lokual tabata un kresementu di 85% kompará ku aña 2021 i un kresementu di 6% kompará ku aña 2019 ku tabata e aña promé ku pandemia. Pa loke ta trata e promé kuartal di aña 2023, Kòrsou a registrá un total di 136.518 turista di estadia, kual ta un kresementu di 22% kompará ku e mesun periodo akí na aña 2022. 
Luna di aprel 2023 te ainda tabata un luna rèkert pa e aña akí ku un total di 48.450 turista; pues di yanüari te ku aprel 2023 ya nos a risibí 184.968 turista e aña akí. E aerolínea ku a trese mas turista den e periodo akí tabata KLM (22%) i TUI (19%) for di Hulanda i American Airlines (19%) for di Estádos Unídos. Konhuntamente ku partnernan manera KLM, TUI, Corendon, JetBlue, Air Canada, Wingo i Azul, CTB a ehekutá tambe e plan di merkadeo internashonal pa 2023 i diferente akshon di ‘branding’ pa medio di deporte ku entre otro FC Ajax, World Baseball Classic, Serie del Caribe i Curaçao Little League Foundation. Huntu ku esakinan, a bolbe aktivá aktividatnan di merkadeo na Venezuela despues di e re-apertura di frontera.
CTB huntu ku Gobièrnu di Kòrsou ta implementando un trayekto di kapasitashon (her & bijscholing) den sektor di hospitalidat, for di kua resientemente 63 persona a terminá un kurso di sea bartènder, waiter òf kòki pa asina duna nan aporte den e sektor. Finalmente pa loke ta trata trabounan di konstrukshon den kuadro di Quick Win Plan pa e área di Zakito, CTB a indiká ku esakinan a finalisá den e periodo tras di lomba i ta preparando pa fase 2. Na área di rekreashon Marie Pampoen, aktualmente ta trahando pa finalisá e trabounan di fase 3.
Pa loke ta trata e desaroyonan 
den sektor hotelero, CHATA a indiká durante e konferensha di
prensa ku na aña 2022 Kòrsou a konosé un oumento di 19,1% kompará ku aña 2021 den
okupashon di kambernan. Nos a yega na mesun nivel di okupashon di kamber ku na 2019 esta 70%. Mas aleu, e tarifa promedio diario pa kamber (ADR) tambe a konosé un oumento di 19.3% den 2022 kompará ku 2021. Asta kompará ku e sifranan di e ADR na 2019, e tarifanan di 2022 ta mustra un oumento di 29%. Pa 2023, CHATA ta ferwagt un kantidat di 587 kamber nobo.
Turismo krusero tambe tabatin desaroyonan sumamente alentador pa kompartí. CPA a indiká durante di e konferensha di prensa ku durante aña 2022 Kòrsou a risibí un total di 281 barku krusero lokual ta un kresementu di 163% kompará ku aña 2021. Mester bisa ku, dor di e situashon di COVID 19, solamente di yüni pa desèmber den aña 2021 tabata tin turismo krusero. 
Un total di 533,831 turista krusero a bishitá Kòrsou na aña 2022 representando un oumento di 265% kompará ku aña 2021. E kresementu akí tabata debí na tantu un oumento den e kantidat di barkunan krusero ku a bishitá nos isla pero tambe un oumento den e kantidat di okupashon den e barkunan akí ku un averahe di 63% den 2022. CPA ta proyektá ku e ‘trend’ di kresementu akí lo kontinuá tambe den aña 2023. Den e promé kuartal ya kaba nos a risibí 126 barku krusero kual ta 6% mas tantu kompará ku e mesun periodo akí na aña 2022. Esaki a trese un kantidat di 318,869 pasahero lokual ta un oumento di 121% kompará ku e promé kuartal di aña 2022. Sifranan di okupashon tambe ta mustra masha alentador ku un averahe di 84% den e promé kuartal di 2023 den kua luna di mart a yega 87%. Kompará ku e averahe di okupashon durante e mesun periodo akí na 2022 nos a yega e tempu ei solamente na 42%.
Pa loke ta trata e impakto ekonómiko di e sektor di turismo, MEO a konkluí ku esaki tabata supstansial. Esaki debí na e kresementu di tantu turismo di estadia komo turismo krusero na aña 2022. Den aña 2022 e sektor di turismo a generá un total di 2.774 mion florin pa nos ekonomia kompará ku 1.508 mion florin den 2021. Esaki ta representá un porsentahe di kresementu di 84%. Esaki ta un rekuperashon kompletu despues di pandemia si kompará ku aña 2019. Pa promé kuartal di 2023 MEO ta kalkulá ku e sektor di turismo a generá un total di 698 mion florin. Pa sobra di 2023 MEO ta proyektá ku si sigui riba e ‘trend’ akí lo tin un kontribushon positivo riba Kòrsou su Produkto Interno
Bruto (GDP). MEO huntu ku CTB konhunto ku partnernan den sektor privá lo sigui traha duru pa prepará nos hendenan i yena e kuponan di trabou habrí den e sektor di turismo. Tambe lo enfoká na sigui alsa e nivel di kalidat i diversidat di nos produkto turístiko.
Pa download e presentashon ku tur e sifranan ku a keda presentá durante di e Konferensha di Prensa, klek aki
