Publiká riba 01 Febrüari 2019
Den kuadro di e trayekto pa mehorá i optimalisá su relashon i komunikashon ku e sindikatonan ku ta representá miembronan di kuerpo polisial, na luna di mei 2018 Minister di Hustisia Quincy Girigorie a introdusí un enkuentro struktural ku sindikatonan NAPB, ABVO i SAP kual sindikatonan ta representá miembronan di e kadena hudisial. Aparte di e enkuentronan entre e titular di Hustisia i representantenan di e sindikatonan konserní, Minister a re introdusí tambe enkuentronan struktural entre e representantenan sindikal i mando di kuerpo polisial. Den ámbos reunion ta elaborá konsekutivamente riba diferente punto riba nivel stratégiko i operashonal pa mehorá funshonamentu di e kuerpo. E próksimo reunion entre Minister i e representantenan sindikal tabata planeá pa tuma lugá mayan djabièrnè 1 di febrüari 2019, despues ku pa motibunan imprevisto e reunion di 17 di yanüari a keda posponé.
Ayera 30 di yanüari 2019, algun miembro di kuerpo polisial a drenta akshon, pa motibu di sierto puntonan ku segun nan no ta risibiendo e atenshon nesesario, ni di parti di mando polisial ni Minister di Hustisia. Mirando e echo ku vários di e puntonan aki ya ta den tratamentu entre Minister di Hustisia i e sindikatonan, Minister a tuma e desishon di adelantá ku un dia, e reunion struktural ku representantenan di sindikatonan i invitá nan pa reuní ku su persona awe 31 di yanüari 2019 pa 11 or’ di mainta.
Mirando ku sindikato SAP a informá di lo kontinuá ku un otro reunion ku miembronan di kuerpo i lo a asistí na e reunion menshoná algu despues di e orario stipulá, e reunion a kuminsá ku e dos otro sindikatonan ku ta NAPB i ABVO i dos representante di mando polisial. Minister a invitá representantenan di mando polisial pa nan tambe ta presente na e reunion aki, pa asina nan por a duna nan aporte i reakshoná mesora riba e puntonan di preokupashon.
Den e reunion aki a trata entre otro puntonan ku ta di preokupashon pa e miembronan ku ta den akshon di kual mayoria tabata riba agènda pa keda tratá den e reunion di mañan. Komo ku ta puntonan ku ya kaba tabata ser tratá entre sindikatonan, Minister i òf mando polisial, presentenan por a yega relativamente fásil i lihé na palabrashonnan i stipulá fechanan konkreto pa loke ta trata ehekushon
Ta trata aki di puntonan manera entre otro introdukshon di ‘Politie Regeling’ i ‘Rechtspositiebesluit, ‘seguridat di e personal, evaluashon di e ‘Inrichtingsplan’ i su kambionan, ünifòrm i tambe posibilidat pa e personal por sigui krese den e organisashon.
E palabrashon ku na kua a yega ku e sindikatonan ta ku nan lo presentá tur loke a keda kumbiní i palabrá na nan miembronan i seguidamente nan lo informá minister di resultado di esaki, pa asina e trayekto di optimalisashon di komunikashon por sigui duna e frutanan deseá.
