Publiká riba 12 Desèmber 2023
WILLEMSTAD – Gobièrnu di Kòrsou huntu ku Fundashon Estatua mr. dr. M. F. da Costa Gomez ta hasi desvelo di e estatua restourá na Gomezplein (Punda) riba e dia memorabel di Statüt, 15 di desèmber awor. E fundashon den koperashon ku Gobièrnu ku ta keda representá pa Ministerio di Enseñansa, Siensia, Kultura i Deporte (ESKD) ta traha huntu den koperashon pa restourashon di e monumento akí ku ta importante pa nos pais.
Restourashon di e monumento ta di sumo importansia pa motibu ku e fundashon su meta ta pa restourá i asina mantené e estatua, i tambe pa duna mas tantu informashon posibel di nos héroe nashonal mr. dr. Moises Frumencio da Costa Gomez. Intenshon ta pa duna publisidat na su idealnan i trabounan ku a keda hasí den pasado. Hasiendo esaki nos lo sa kiko tur a sosodé den pasasdo, kual lo fungi komo base fundamental pa sigui fiha rumbo i direkshon di nos pais.
E seremonia ta tuma lugá riba djabièrnè 15 di desèmber 2023, di 16:00 pa 19:00 na Gomezplein den Punda. Henter pueblo di Kòrsou ta keda invitá pa partisipá na e momentu memorabel i históriko akí.
Informashon di e Fundashon Estatua mr. dr. M. F. da Costa Gomez:
E fundashon tin komo meta pa preservá i promové memoria i herensia intangibel di mr. dr. Moises Frumencio da Costa Gomez. Atraves di edukashon i inspirashon ta enfatisá i pone atenshon na e balor agregá balioso di su esfuersonan pa pais. Su esfuerso inkansabel i e pashon ku e tabatin pa desaroyo di Kòrsou, en espesial e parti kaminda el a para firmemente pa derechi i igualdat di prinsipalmente esnan ménos preveligiá den nos komunidat, ta un karakterístika sumamente bunita. Konsekuentemente e fundashon tei pa promové e balornan akí komo kampaña di konsientisashon na nos komunidat. Pa mas informashon di Fundashon Estatua mr. dr. M. F. da Costa Gomez por tuma kontakto via koreo elektróniko: info@estatuadacostagomez.com.
Download aki e invitashon na komunidat di Kòrsou.
