Desvelo ofisial área di rekreo i deporte den bario di Koraalspecht i Montaña - Informashon tokante Gobièrnu di Kòrsou Bo opinion

Notisia

Desvelo ofisial área di rekreo i deporte den bario di Koraalspecht i Montaña

Geplaatst op 14 March 2021 dor di Ministerio Asuntunan General i Promé Minister

WILLEMSTAD — Riba 3 i 4 di mart último, Promé Minister Rhuggenaath tabatin e gran plaser pa por a hasi entrega di 2 proyekto di infrastruktura sosial na habitantenan di barionan Koraalspecht i di Montaña. Reda Sosial a keda enkargá pa Ministerio di Asuntunan General ku realisashon di e proyektonan akí komo parti di e Agènda pa Desaroyo Sosial (Strategia di Kresementu), ku e meta pa alsa kalidat di bida den e barionan dor di krea espasio komunitario pa grandi i chikí por bini huntu.

Na Kaya Tinashi na Koraalspecht, Promé Minister Rhuggenaath a hasi apertura di e parke di rekreo multifunshonal kaminda habitantenan por rekreá, hasi deporte i bini huntu komo famia i bario pa kompartí momentunan ku otro. Pa e muchanan di bario tin un área pa hunga i entretené nan mes, i mei mei di e plenchi habitantenan por sinta, kombersá i disfrutá di otro su kompania. Tambe tin un otro área ku ekiponan spesial pa habitantenan por kuida nan salú i traha riba e parti di moveshon.

Riba djaweps 4 di mart, Promé Minister Rhuggenaath tabata den bario di Montaña pa hasi desvelo ofisial di vèlt di Deporte Juf. Rosa Panneflek na Sentro di Bario Montaña. Asin’akí kumpliendo ku un deseo di e bario ya pa basta tempu. E kancha di deporte a haña e nòmber Juf. Rosa Panneflek na honor di su trabounan hasí huntu ku muchanan di bario di Montaña.

Sentro di Bario Montaña ta organisá diferente aktividat i enkuentro durante aña ku mucha, hóben, adulto i adulto mayó. Den kuadro di e Agènda pa Desaroyo Sosial a skohe e proyekto akí di forma ku e sentro di bario por sigui amplia su aktividatnan, stimulá embolbimentu den bario i asina kontribuí na un mihó bienestar di habitantenan.

Promé Minister Rhuggenaath ta hopi satisfecho ku finalisashon di e trabounan i kier yama un danki na Reda Sosial pa konkluí e proyektonan di Agènda pa Desaroyo Sosial akí eksitosamente. Trabounan ta sigui den bario di Westpunt i tambe pa ku e proyekto ‘Quick Fixes’ kaminda ta drecha kasnan di famia den gran nesesidat huntu ku kontratistanan chikitu.

Ministerio konserní