Publiká riba 21 Yüli 2023
WILLEMSTAD – E delegashon di Kòrsou a regresá satisfecho for di e di 38 edishon di Canto na Miami, despues di un tremendo prestashon ku un booth impreshonante. Despues di dos dia interesante ku diskushonnan tokante e situashon di telekomunikashon den nos region i ponensianan fuerte di parti di gobièrnunan i reguladónan di region den direkshon di kompanianan di telekomunikashon, a toka riba e último dia pa konkretisá Kòrsou su pasonan pa bira e ‘Digital Hub of the America’s’.
Djamars 18 di yüli a lansa e-marketplace, un plataforma ku ta publiká tur destaho públiko di gobièrnunan di nos region. Kòrsou ta e promé pais riba e plataforma. Riba e di tres i último dia di konferensia Minister Cijntje a presensiá firmamentu di un MOU entre Blue Nap Americas i Datasur di Suriname pa huntu bai lanta e asosiashon di Data Center pa Karibe pa asina yega na un forma pa kolaborá mas efektivo. Su sede lo ta na Kòrsou. Tambe e Mandatario a presensiá e momentu ku Caribbean Telecommunications Union (CTU) a aseptá Blue Nap Americas komo miembro. E meta ta awor pa Kòrsou komo pais bira miembro di CTU. Nos empresarionan a logra hasi bon kontakto i a keda satisfecho ku e resultado.
Sektor di ICT ku un futuro prometedor
Den Kòrsou su Strategia Nashonal di Eksportashon 2022-2027 (NES), un di e sektornan prominente pa yuda diversifiká i krese nos ekonomia ta netamente e sektor di ICT, kual minister di Desaroyo Ekonómiko a kompromete su mes pa desaroyá komo e di kuater pilá ekonómiko. Canto ta un konferensia ku den pasado tabata enfoká solamente riba telekomunikashon i su infrastruktura, pero ku aktualmente a amplia su vishon i ta basa su enfoke riba e sektor di ICT den su totalidat. Mirando e importansia ku mundu ta dunando e sektor di ICT, ta un konvikshon mas ku nos strategia di ICT ta unu prometedor.
Durante Canto 38, Kòrsou a tuma un ròl di lider den region riba tereno di ICT, ku mas di 20 empresa den ICT ku a demostrá e forsa ku Kòrsou tin i a duna un ehèmpel na otro paisnan presente ku union ta hasi forsa. Durante e konferensia Minister Cooper tabata señalá ku nos mester krea un region fuerte basá riba kolaborashon i no kompetensia, i ku mester atendé ku e kompanianan di telekomunikashon komo un union i stimulá nan pa subi nan nivel di servisio dor di atraé mas kompetensia. Esaki a krea diskushonnan interesante i a yega na palabrashonnan ku ta bai sinta na mesa den komishonnan chikí pa atendé realmente ku e multinashonalnan.
Canto 40 na Kòrsou!
Na final di e konferensia, Canto a anunsiá ku otro aña nan lo ripití e konferensia na Miami. Minister Cijntje a invitá e Presidente di Canto Mike Antonius i SG di Canto Theresa Wankin pa Canto bin Karibe bèk i pa nan tene nan edishon number 40 na Kòrsou na 2025. Presidente di Canto a aseptá e invitashon i a duna su palabra ku CANTO 40 lo ta na Kòrsou. Ougùstùs e SG lo bishitá Kòrsou i lo probechá pa hasi un “site inspection”.
Bishitá https://curacaoexport.org/curacao-national-export-strategy/ pa e strategia di eksportashon.
