Publiká riba 08 Mei 2024
Willemstad- Tema sentral den e edishon di e aña aki ta: “Demystifying Exports”. “Nos ta bai kita mito i misterionan relashoná ku eksportashon for di mente i referensia di nos empresarionan. Hopi hende ainda ta pensa ku eksportashon ta kompliká, pa empresa grandi so, pa produkto so o pa servisio so, òf ku nos no ta eksportá nada, èts. Nos ta bai mustra e proseso, nos ta bai ilustrá ku echonan, atrabes di estadístikanan i tambe sifra, i nos ta bai mustra kon pa yega na informashon” asina Minister Ruisandro Cijntje ta enfatisá.
Curacao Export Week ta un siman pa pone atenshon, i pa selebrá logronan riba tereno di eksportashon. Hopi aktividat nobo a keda inisiá entre e edishon di 2023 i esun di 2024. ” Nos a avansá hopi mas i nos ta den pleno implementashon di nos Strategia Nashonal di Eksportashon” e mandatario ta sigui bisa.
Sektornan ta hañando mas atenshon i nos ta mirando un entusiasmo bou di nos empresarionan pa mira pafó di nos fronteranan pa oportunidatnan nobo” segun Vanessa Toré, Direktor di e divishon ku ta atende ku komersio internashonal den MEO ta indiká.
Nos tin empresanan ku a inisiá aktividatnan na Aruba, Colombia, Bonaire, Bahamas, pero tambe na Sürnam, Guyana, Trinidad & Tobago i Hulanda, i vários pais mas. Nos ta mira den sektor kreativo mas i mas ekspanshon, i tambe den IT ta desaroyando Kòrsou komo Digital Hub of the Americas ku ta atrayendo hopi invershonnan nobo. Nos Zona Franca ku tambe ta mirando ekspanshon i ku a establesé un Zona Industrial nobo den haf pa por atraé mas empresa ku e mira riba eksportashon. Anto no papia mes di Turismo ku ta mustrando kresementu históriko ku nunka ántes nos a konosé, ku kresementu bárbaro den merkadonan di Brasil, Merka, Canada, Alemania i nos merkado tradishonal ku ta Hulanda tambe a oumentá.
Ora bo pone atenshon i bo ta determiná pa logra i keda konsistente, bo ta mira kambio. Esei ta desaroyo ekonómiko. Ora kuminsá mester sigui i Curaçao Export Week i e National Export Strategy ta un ehèmpel di perseveransia, desaroyo i esaki no ta pa kasualidat, pero ta “by design”, ta pa medio di un bon strategia diseñá, vishon i determinashon, sostené pa trabou duru” Minister Cijntje ta ilustrá. Ta Minister Cijntje su di 3 edishon di Curaçao Export Week!
Kiko por spera den Curaçao Export Week 2024!
Charlanan tokante tópikonan interesante manera ‘Artificial Intelligence – AI’, LGO Regeling, Mega Trends: Era Nobo, Kòrsou kompará ku otro SIDS, ku lo duna un bista di nos desaroyo i nos potensialnan kompará ku otro SIDS, ku Professor Roger Hossein di University of the West Indies na Trinidad i tambe nos ta bai papia di Hende Muhé den Eksportashon ku Andrea Ewart di Jamaica. Nos ta bai tin un Trade Game, pa medio di kua bo por tèst si bo tin e proseso di eksportashon dominá.
Desaroyonan Geopolitiko i kon nan ta kambia rumbo di mundu i kon nos mester prepará, i tambe kon pa hasi negoshi ku Spaña, ku Trinidad & Tobago, Colombia i Repúblika Dominikana. Nos ta duna updates di Proteus, i nos ta lansa proyektonan nobo den Blue Bio Economy i sektornan nobo manera Medical and Wellness Tourism, Curaçao Music Office den Sektor Kreativo, Inougurá ofisina di e asosiashon regional Caribbean Women in Trade i pa korona e obra nos lo lansa e portal di mas kompletu pa negoshi aki na Kòrsou, www.meo.cw. Anto sufisiente momentu pa nètwèrk!
Pues un siman di selebrashon di logronan i adelantonan i alabes oportunidatnan lo keda presentá. Nos ta wak bek na un aña kargá ku hopi kos positivo i tambe premirá un aña di kresementu ekonómiko stimulá pa eksportashon!
Registrá via www.curacaoexport.org pa bo no pèrdè niun di e eventonan aki. E lugánan ta limitá, e sitionan ta variá i lo tin algun seshon online tambe.
