Publiká riba 26 Yüli 2026
SDKK lo duna bèk na komunidat ku 300 pela GRATIS
WILLEMSTAD; – Dianan 17 pa 19 ougùstùs 2026, lo bai tuma lugá e di dos edishon di e proyekto di pelamentu di Sentro di Detenshon i Korekshon Kòrsou“ Back to School”.
E meta di e proyekto aki ta, pa duna bèk na komunidat i tambe ta forma parti di un trayekto di resosialisashon, kaminda e klientenan ku a terminá e kurso di Barbero ta demostrá nan abilidat i profeshonalismo di pelamentu. Minister di Hustisia sr. Shalten Hato a duna su aprobashon pa ku e di dos edishon di e bunita proyekto di Back to School. Tambe Minister di Hustisia mr. Shalten Hato a enfatisá ku e kier oumentá e kantidat di muchanan ku lo por haña oportunidat di keda pela dor di e klientenan di SDKK. Mas aleu e proyekto aki ta haña gran koperashon di Ministerio di Hustisia, KPC i Brantwer Kòrsou ku tambe lo duna nan sosten e dianan di pelamentu di e diferente muchanan ku partisipá na Back to School – SDKK Barbershop.
Den kuadro pa duna mas muchanan oportunidat pa pela, a repartí e sitionan di pela den 3 diferente bario aki na Kòrsou, kaminda lo tin espasio pa pela mas ku 100 mucha den kada bario. E skema di pelamentu den e 3 diferente barionan lo bira: dia 17 di ougùstùs 2026 na Sentro Bario di Montaña, Dia 18 di ougùstùs 2026 lo ta na Kluphuis di Skouting na Sta.Maria (Pega ku Santana di Sta.Maria) i 19 di ougùstùs 2026 na Sentro Bario di Tera Kòrá.
Pa mas informashon òf pa partisipá na e proyekto aki, lo mester registrá e muchanan na departamentu di Edukashon, Formashon i Training di SDKK na telefòn: 4348447 òf 4348494 òf por manda Whatsapp na 694-2187 pa inskripshon di e yu.
