Publiká riba 23 Yanüari 2018
E fecha aki ta dia di nasementu di Endrew Isabella, un alumno ehemplar ku semper a sa di destaká den tur lokual ku ela hasi. Endrew tabata un hóben ku apesar di su malesa króniko, semper a mantené perseveransha, positivismo i determinashon. Lamentablemente Endrew a pèrde e bataya kontra su malesa, pero su leyenda ta keda bibu. Pa e motibu aki, nos ta keda konmemor’é di un forma speshal. Tur mucha ku di un of otro forma a sobresalí den enseñansa durante e aña eskolar, ta keda pone den spòtlight pa asina risibí e atenshon i elogio ku nan meresé.
Den kuadro di esaki, Minister M. Alcalá-Wallé a invitá tur alumno di skolnan supsidiá dor di Gobièrnu ku a destaká pa akudí na Fórti riba djaluna 22 di yanüari último, pa duna kada un alumno su rekonosementu i ‘pen’ di bandera di Kòrsou. E selekshon a kana pa medio di e direktiva di skolnan. Kada skol, a duna nòmber di e alumno ku segun nan meresé rekonosementu. E merdia di rekonosementu tabata emoshonante kaminda e muchanan, dosentenan, mayornnan i mama di Endrew a bini huntu pa konta nan testimonio i kompartí ku otro.
Na final di e enkuentro aki, Minister President sr. E. Rhuggenaath a hiba un palabra di enkurashamentu na e alumnonan i nan tabata tin e oportunidat pa saka potrèt huntu ku Minister E. Rhuggenaath i Minister M. Alcalá-Wallè riba plenchi di Fòrti.
Por mira e grabashon di e mèrdia aki riba Facebook página di Minister van Onderwijs, Wetenschap, Cultuur & Sport. Klik rib ae link aki pa wak e grabashon: Grabashon na Fòrti
