Publiká riba 26 Yüli 2019
Willemstad – Palu di Mangel (Mangrove) ta un tipo di vegetashon di sumo importansha ku ta krese na kostanan entre laman i tera. Ta e importansha di e vegetashon aki a pone ku na 2015 durante un konferensha di UNESCO a proklamá ku tur aña riba 26 di yüli ta selebrá Dia Internashonal di Mangrove. Meta di e dia aki ta pa konsientisá hende di e importansha di ekosistemanan di Mangrove komo ekosistemanan úniko pero vulnerabel i pa promové solushonnan pa nan sostenibilidat. Mangrove ta di sumo importansha pa biodiversidat, protekshon di kosta, purifikashon di awa, turismo i pa produkshon di nos kuminda.
Den nos área di Karibe i Amérika Sentral tin alrededor di 8 sorto di Mangrove. Tur e sortonan aki ta di sumo importansha pa biodiversidat komo ku nan ta forma un habitat pa diferente sorto di para, piská i organismonan marino. Banda di esaki e ubikashon di áreanan di Mangrove entre tera i laman i e struktura di e raisnan ta forma un protekshon natural di kosta kontra eroshon, laman brutu òf orkan. Áreanan grandi di Mangrove ta sòru tambe pa purifikashon di airu i awa di laman kontra sierto tipo di polushon.
Sierto áreanan di Mangrove ku ta limpi i bon mantené ta un interesante atrakshon turístiko. Turistanan tin e posibilidat pa medio di un kanoa i un guia, bishitá e áreanan di Mangrove aki pa disfrutá di nos bunita naturalesa. E aspekto turístiko aki ta representá un balor ekológiko i ekonómiko ku por keda tradusí den ingreso. Otro aspekto di sumo importansha ta ku áreanan di Mangrove ta promové oumento di piská. Diferente sorto di piská ta frekuentá òf biba i brui mei mei di e raisnan di Mangrove den laman. Pues Mangrove ta un skondite perfekto i vivero pa diferente sorto di piská ku nos ta kome.
Tratadonan internashonal ku ta protehá Mangrove ta: RAMSAR Convention, Convention on Biological Diversity i SPAW Protokol. Aunke nos ta realisá importansha di Mangrove, ainda Kòrsou falta algun lei lokal pa protekshon di Mangrove. Pero esaki no ta nifiká ku por kap Mangrove sin mas. Ministerio di SMN semper ta aktua riba kasonan ku keda deskubrí òf notifikashonnan di komunidat hasiendo uzo di e Ordenansa di Maneho i Protekshon di Naturalesa i e Ordenansa di Molèster.
