Publiká riba 05 Òktober 2020
Mundialmente e pandemia di COVID-19, ta sigui asentuá e importansia di akseso na informashon. Durante e krísis aki por mira i sinti e importansia di akseso na informashon den e aspekto di salba bida di esnan ku keda infektá ku e vírùs di Corona. Banda di esaki akseso na informashon ta nesesario pa establesé konfiansa i speransa, i ta p’esei e aña aki e tres aspektonan aki ta forma base di e mensahe di Nashonnan Uní den kuadro di e Dia Internashonal di Akseso na Informashon. (https://en.unesco.org/commemorations/accesstoinformationday).
Komo nashon nos tambe a enfrentá i ta enfrentando diferente reto riba e tereno aki, mirando ku durante e krísis di COVID-19 nos ta realisá ku pa gran parti di yudansa ta dependé di akseso na informashon. Aki por referí n’e petishonnan pa sosten finansiero NOW, entrega di pakete di kuminda, pero tambe suministrashon di informashon i konosementu pa mantené siguridat i bienestar general.
Akseso na informashon den un pais ta rekerí leinan ku ta regla esaki. I for di 1996 Kòrsou tambe ta pertenesé na paisnan ku ta regla akseso na informashon di Gobièrnu pa medio di lei. Ta trata di e “Lei di Transparensia (Lob)” i e “Lei di Archivo (Archieflandsverordening), ku ta brinda kada siudadano e posibilidat pa haña un bista kon gobernashon di su pais ta kana. I den e proseso pa logra esaki maneho di gobernashon ta un faktor klave, mirando ku maneho ta instrumento ku por yuda optimalisá e.o. e liñanan di informashon di Gobièrnu.
Den esfuerso pa garantisá akseso na informashon na Kòrsou, Archivo Nashonal tin un funshon klave pa perkurá pa kada departamentu di Gobièrnu kumpli ku nan deber pa traspasá nan archivonan despues di 20 aña pa Archivo Nashonal, di forma ku e informashon ta bira aksesibel pa públiko. Resientemente Archivo Nashonal a logra optené archivonan gobernamental di Kòrsou te ku 1999 i awor e kolekshon di archivonan gobernamental ku ta aksesibel pa públiko ta kore di 1687 pa 1999. Segun e Lei di Archivo esaki ta enserá ku un siudadano por konsultá e dokumentunan aki grátis.
Pa konmemorá e Dia International di Akseso na Informashon, 28 di sèptèmber, Archivo Nashonal a entregá un regalo simbóliko na e Departamento di Maneho (BeleidsOrganisatie) di e Ministerio di Maneho di Gobernashon, Planifikashon i Servisio Públiko.
Personanan di Kontakto:
Modianne Cathalina i Glendalin William respektivamente modianne.cathalina@gobiernu.cw i glendalin.william@gobiernu.cw.
