Publiká riba 04 Aprel 2018
Willemstad – Sentro di Trabou resientemente a kuminsá ku e proyekto di Mikro Finansa den estrecho kolaborashon ku Korpodeko i Ministerio di desaroyo Ekonómiko MEO. E idea ta pa informá i atraé hòmber i muhé madurá i talentoso ku ya kaba ta lora man i ke traha na un manera mas profeshonal pa nan haña entrenamentu rigoroso di algun luna pa despues di a proba ku nan ta dediká pa engrandesé e negoshi, bini na remarke pa un mikro finansa. A kuminsá drenta e barionan Westpunt, Lagun, Dokterstuin i Soto. E oportunidat aki ta pa habitantenan di Bándabou te Bándariba.
E método ta pa studia e profil di kada bario ku ta drenta promé, kaba pa tuma kontakto ku personanan klave den bario i pa drenta bario i splika habitantenan personalmente di e proyekto. Esaki ta loke ta yama ‘fact finding mission’. A base di e interakshon ku bario ta skohe unda por ta un lokashon sentral den e bario pa organisá un Happy Hour informativo.
Sentro di Trabou a organisá i tene su promé Happy Hour informativo na Soto. Despues Sentro di Trabou a organisá i tene su promé Happy Hour informativo na Tera Korá. Seguidamente Sentro di Trabou a organisá i tene su promé Happy Hour informativo na Souax. A parti foyeto den varios bario te ku awor e asistensia i interes di pueblo ta bastante grandi.
Dia 6 di april ta toka habitantenan di Bonam, Brievengat i besindario pa asistí na e siguiente Happy Hour. E evento lo tuma lugá na Kas di Bario Brievengat (Kaya John Monsanto z/n). Di 6’or di atardi pa 8’or di anochi tin seshon di informashon, pregunta i registrashon.
