Publiká riba 09 Novèmber 2018
Willemstad – Ministerio di Desaroyo Sosial, Labor i Bienestar (SOAW) ku otro partnernan ministerial (Gobernamental ) i sosial (no-gobernamental) a organisá e dia di estudio i evaluashon di 6 luna di Plataforma Plan Nashonal kontra violensia doméstiko/relashonal i mucha.
Un apertura impreshonante:
Debí na ousensia di Minister Koeiman, su remplasante, Minister Konkèt a habri e dia. Den su diskurso el a rekapitulá tur eventonan anterior i ehersisionan ehersé pa a yega na un plan nashonal kontra violensia doméstiko/relashonal i mucha pa pais Kòrsou (dekreto firmá 7 di mart 2018).
Despues a inougurá un kansion skibí pa un di e artistanan mas sélebre di nos pais, Ike Jesurun. Minister Konket a boutisá e kansion i un grupo di SOAW a presentá un baile, un koreografia pa tur partner ku a partisipá na e evenementu.
E ora ey a sigui presentashon di e miembronan di e komishon pa SOAW ku lo mester guia implementashon di e plan, kende ta :Sr. Marlon Martina, Dinaida Bartholomeus, Ruthline Koeiman-Benschop (koordinadó pa SOAW), Miosotis Yearwood, Corinne Mollis i Sandra Eustatius. E tim aki ta forma parti di un tim mas grandi ku ta konsistí tambe di representantenan di Ministerio di Hustisia i di Ministerio di Salubridat Públiko, Medio Ambiente & Naturalesa.
Algun di e Konklushonnan:
E dia di estudio, guiá pa prof. dr. Yvonne Sliep, ku a guia e therapia pa kambio, a yega na bastante palabrashon. Algun di e palabrashonnan:
Kada 6 luna e plataforma ta evaluá progreso di e plan nashonal kontra violensia. Diferente organisashonnan di e plataforma KRAK ( Komunidat Restourá Abusu Kibrá ) lo implementá plannan pa e 6 luna benidero, ku kada organisashon a traha durante e dia aki. Ministerionan di Enseñansa i di Salubridat lo sigui yena nan puestonan vakante di koordinashon konforme e dekreto pa implementashon por kana. Lo traha un lista di tur organisashonnan den e plataforma, nan ekspertisio i nan puntonan fuerte pa ehekutá programanan preventivo. NGO-nan lo hasi diferente proyektonan den kolaborashon ku otro, nan lo alsa lasonan i kompromiso sosial entre organisashonnan pa kombatí violensia huntu na un manera struktural. Tambe a kumbiní ku dia 15 di mei 2019, ku ta dia internashonal di famia, lo keda konmemorá huntu, den aliansa entre tur partnernan di e plataforma kreá bou Plan Nashonal kontra violensia. Lo bini un marcha di famia i tambe marchanan di silensio. Lo bini un kuríkulo di restourashon pa tur miembro di e plataforma nashonal aki. Tambe lo bini ku entrenamentu pa tur hende muhé uniformá riba trabou. Lo nombra un kordinadó pa ehekushon di Hustisia Restourativo na SEDA. Lo bini protokòl entre ministerio di Hustisia, Ministerio Públiko i SOAW pa trata e ruta di Hustisia Restourativo, manera konklushon di simposio di 2 òktober 2018 a indiká. Lo bini kontinuashon di e raportage di sombra (schaduw- rapport) riba e kombenio di Istambul, esaki den kolaborashon ku e ret di muhénan(NGO) den Reino. Lo sali spòtnan di testimonio di víktimanan di violensia.
E bunita dia tabata na satisfakshon di tur hende presente. Manera e dia a kuminsá a balia “STRONG GIRL” huntu komo símbolo di energia pa traha mas uní pa ehekutá tur lokual a keda palabrá. Pa evaluashon di progreso di trabounan Prof. Dr. Yvonne Sliep lo ta bèk na luna di yüni 2019.
